وفاقی وزیر مذہبی امور سردار محمد یوسف نے کہا ہے کہ پاکستان اور سعودی عرب یک جان دو قالب ہیں، حرمین شریفین کا دفاع ہمارے لیے مقدس فریضہ ہے۔
وفاقی وزیر مذہبی امور سردار محمد یوسف نے ان خیالات کا اظہار مکہ مکرمہ میں شاہ سلمان بن عبدالعزیز کے مشیر شیخ سعد الشسری سے ملاقات میں کیا۔ اس موقع پر پروفیسر سجاد قمر اور ڈاکٹر احسان ساجد بھی موجود تھے۔
وفاقی وزیر مذہبی امور نے کہاکہ سعودی عرب اور پاکستان یک جان دو قالب ہیں۔ پاکستان کے عوام اور حکومت ہمیشہ سعودی عرب کے ساتھ ہے، سعودی عرب نے ہر مشکل میں پاکستان کا ساتھ دیا اور کبھی بھی تنہا نہیں چھوڑا۔
انہوں نے کہاکہ حرمین شریفین ہماری عقیدتوں کا مرکز ہے، اور اس کے لیے جان بھی قربان کرنا ہم سعادت سمجھتے ہیں۔ شاہ سلمان بن عبدالعزیز اور ولی عہد شہزادہ محمد بن سلمان نے حجاج اور معتمرین کی تاریخی خدمت کی۔ ہر سال سہولیات میں اضافہ ہو رہا ہے۔
سردار محمد یوسف نے کہاکہ ہم چاہتے ہیں کہ عربی زبان کو فروغ دیا جائے، عربی قرآن کی زبان ہے اور اس کا سمجھنا ہم سب کے لیے انتہائی ضروری ہے۔
شیخ سعد الشسری نے وزیر مذہبی امور کا تشریف آوری پر شکریہ ادا کیا اور کہاکہ سعودی عرب روز اول سے پاکستان کے ساتھ ہے۔ پاکستان کی سلامتی اور ترقی کے لیے ہر وقت دعا گو ہیں۔
انہوں نے کہاکہ پاکستان کی مضبوطی اور استحکام امت مسلمہ کی مضبوطی ہے۔ علما کرام کے وفود کا تبادلہ ہونا چاہیے تاکہ دونوں طرف کے تجربات سے استفادہ حاصل کیا جا سکے، عربی زبان کے فروغ لیے ہر طرح کے تعاون کے لیے تیار ہیں۔
