اقلیتی برادری کے حقوق کی حفاظت کرینگے، شہباز شریف کا وزیر اعظم ہاؤس میں منعقدہ تقریب سے خطاب

وزیراعظم شہباز شریف نے وزیراعظم ہاؤس اسلام آباد میں کرسمس کی تقریب سے خطاب کرتے ہوئے مسیحی برادری کی پاکستان کے لیے تاریخی خدمات کو سراہا اور یقین دہانی کرائی کہ پاکستان میں ہر شہری کو بلا خوف و خطر اپنے مذہبی حقوق ادا کرنے کی مکمل آزادی حاصل ہے۔ انہوں نے نبی کریم صلی اللہ علیہ وسلم کے اسباق کے مطابق مذہبی ہم آہنگی، مساوات اور امن کا پیغام دیا۔

اقلیتوں کے حقوق اور قائداعظم کا وژن

وزیراعظم نے کہا کہ قائداعظم محمد علی جناح نے واضح فرمایا تھا کہ پاکستان میں ہر شہری کو قانونی حق حاصل ہوگا کہ چاہے مسلمان، عیسائی، ہندو یا سکھ ہو، بلا خوف و خطر اپنے مذہبی مقامات جیسے مساجد، گرجا گھر، مندر یا گردوارے جا کر اپنی رسومات ادا کرے۔

یہ بھی پڑھیں:بیت اللحم اور غزہ میں جنگ کے بعد پہلی کرسمس، امید کی شمع جلائی گئی

مسیحی برادری کی خدمات کی ستائش

شہباز شریف نے پاکستان میں مسیحی برادری کے تاریخی اور اہم کردار کو سراہا اور کہا کہ قیام پاکستان سے آج تک ہر مذہب کے بھائیوں اور بہنوں نے تعلیم، دفاع، انصاف اور دیگر شعبوں میں اہم خدمات انجام دی ہیں۔ وزیر اعظم نے وطن پر اپنی جان کا نذرانہ دینے والے مسیحی بھائیوں کو بھی یاد کیا اور ان کی قربانیوں کو سراہا۔

اسلام کے اصول اور مذہبی ہم آہنگی

وزیراعظم نے اسلام کے اصولوں کی طرف اشارہ کرتے ہوئے کہا کہ نبی کریم صلی اللہ علیہ وسلم نے انسانیت کے ساتھ مروت، بردباری اور محبت کے ساتھ پیش آنے اور دکھی کو سکون دینے پر زور دیا۔

یہ بھی پڑھیں:یومِ قائد اعظم اور کرسمس کے موقع پر اسحاق ڈار کا پیغام: مذہبی ہم آہنگی اور برابری کے عزم کا اعادہ

انہوں نے یقین دلایا کہ کسی اقلیتی شہری کے ساتھ  زیادتی برداشت نہیں کی جائے گی اور قانون پوری قوت کے ساتھ ہر صورت میں عمل کرے گا۔

حکومت کی یقین دہانی اور خوشیوں کا پیغام

شہباز شریف نے کہا کہ وزیراعظم اور حکومت پاکستان ہر برادری کے حقوق کی مکمل حفاظت کریں گے اور ترقی و خوشحالی کے سفر میں اقلیتوں کے ساتھ کھڑے رہیں گے۔ آخر میں وزیر اعظم نے مسیحی بھائیوں اور بہنوں کو کرسمس کی مبارکباد دی اور امن، محبت اور ہم آہنگی کے پیغام کو فروغ دینے پر زور دیا۔