خیبرپختونخوا: بھارتی سرپرستی یافتہ 11 خوارج ہلاک، انسداد دہشتگردی کارروائیاں جاری

وزیراعظم کی خیبرپختونخوا میں فتنہ الخوارج کے خلاف کامیاب آپریشنز پر سیکیورٹی فورسز کو خراجِ تحسین

وزیراعظم محمد شہباز شریف نے خیبرپختونخوا کے اضلاع شمالی وزیرستان اور کرم میں فتنہ الخوارج کے خلاف سیکیورٹی فورسز کی کامیاب کارروائیوں پر افسران اور جوانوں کی پیشہ ورانہ صلاحیتوں کو سراہا ہے۔ وزیراعظم نے ان آپریشنز کے دوران 11 خارجیوں کو جہنم رسید کرنے پر سیکیورٹی فورسز کی جرات، عزم اور مہارت کی تعریف کی۔

وزیراعظم کا کہنا تھا کہ دہشتگردی کے عفریت کے ملک سے مکمل خاتمے تک اس کے خلاف جنگ پوری قوت کے ساتھ جاری رکھی جائے گی۔ انہوں نے کہا کہ افواجِ پاکستان اور پولیس کے جوان شب و روز ملک دشمن عناصر کے خلاف برسرِ پیکار ہیں اور ان کی قربانیاں قابلِ فخر ہیں۔

وزیراعظم نے اس عزم کا اعادہ کیا کہ ہمارے بہادر اور فرض شناس افسران و جوانوں کی موجودگی میں دشمن پاکستان کی جانب میلی آنکھ سے دیکھنے کی جرأت نہیں کر سکتا۔ انہوں نے مزید کہا کہ وہ خود اور پوری قوم سیکیورٹی فورسز کے ارضِ وطن کے تحفظ کے غیر متزلزل عزم میں ان کے شانہ بشانہ کھڑے ہیں۔