وفاقی وزیر اطلاعات عطا تارڑ نے کہا ہے کہ دہشتگردوں کے بیانیے کا ڈٹ کر مقابلہ کریں گے۔
اسلام آباد میں پیغام امن کمیٹی کے اجلاس سے گفتگو کرتے ہوئے ان کا کہنا تھا کہ کل کمیٹی پشاور کا دورہ کرے گی، دورے کے دوران تمام مکتبہ فکر کے علما سے گفتگو ہوگی اور یہ پیغام گھر گھر پہنچایا جائے گا کہ اسلام امن کا دین ہے۔
یہ بھی پڑھیے: قومی بیانیے کی تشکیل کے لیے پیغام امن کمیٹی قائم، کون کون شامل ہوگا؟
انہوں نے سوال اٹھایا کہ یہ کونسا اسلام ہے کہ بھارت سے فنڈنگ لے کر یہاں دھماکے کرو؟ یہ سارا کام پیسے سے چل رہا ہے، افغان حکومت ہر دوسرے روز بھارت جاکر مذاکرات کرتی ہے۔ انہوں نے کہا کہ آئے روز فتنہ خوارج اور فتنہ الہندوستان کے عزائم سامنے آتے جا رہے ہیں۔
وزیر اطلاعات کا کہنا تھا کہ وزیراعظم اور فیلڈ مارشل کی قیادت میں پوری قوم دہشتگردی کا مقابلہ کرنے کے لیے تیار ہے۔
عطا تارڑ نے کہا کہ اس کمیٹی میں اقلیتی اراکین بھی شامل ہیں، اقلیتوں کے حقوق کا تحفظ ہماری ذمہ داری ہے، انہوں نے امید ظاہر کی کہ پیغام امن کمیٹی بااختیار کمیٹی ہے جو دہشتگردی کے بیانیے کا بھرپور مقابلہ کرے گی اور دہشتگردوں کو اپنا نظریہ پھیلانے کی اجازت نہیں ہوگی۔
