پاکستان کی خاتونِ اول بی بی آصفہ بھٹو زرداری نے بحرین کے دارالحکومت منامہ میں بحرین نیشنل میوزیم اور پرل میوزیم کا دورہ کیا، جہاں انہیں بحرین کی قدیم تہذیب، ثقافتی ورثے اور تاریخی تسلسل سے آگاہ کیا گیا۔
دورے کے موقع پر خاتونِ اول کے ہمراہ بحرین کی وزیرِ ہاؤسنگ و اربن پلاننگ اور وزیر اِن ویٹنگ محترمہ امنہ بنت احمد الرمیحی موجود تھیں۔
یہ بھی پڑھیں: انسداد پولیو ویکسینیشن مہم: آصفہ بھٹو نے والدین سے اہم اپیل کردی
میوزیم آمد پر ڈائریکٹر جنرل میوزیمز اینڈ کلچر محترمہ فرح محمد مطر اور ڈائریکٹر کمیونیکیشنز اینڈ پارٹنرشپس ہانی علی بہزاد نے ان کا استقبال کیا۔
First Lady Bibi @AseefaBZ visits the Bahrain National Museum’s Defence Section and other galleries, exploring Bahrain’s rich history, heritage, and cultural legacy during her official visit. pic.twitter.com/lz9ybc2D6Y
— PPP (@MediaCellPPP) January 15, 2026
خاتونِ اول کو دونوں میوزیمز کا تفصیلی دورہ کرایا گیا، جہاں بحرین کی گہری تاریخی جڑوں، تہذیبی ورثے اور سمندری طرزِ زندگی کی عالمی شہرت یافتہ روایات، بالخصوص موتیوں کی غوطہ خوری کی تاریخ کو اجاگر کیا گیا۔
بی بی آصفہ بھٹو زرداری نے بحرینی حکام کی جانب سے پرتپاک میزبانی پر شکریہ ادا کرتے ہوئے کہا کہ قومی ورثے کا تحفظ اور تاریخ کی حفاظت قوموں کی شناخت، یکجہتی اور آئندہ نسلوں کے لیے تحریک کا ذریعہ بنتی ہے۔
مزید پڑھیں: آصفہ بھٹو کا پاکستانی بچوں کی زندگیاں بچانے والے چینی ڈاکٹروں کو خراج تحسین
انہوں نے پاکستان اور بحرین کے درمیان ثقافتی سفارتکاری، میوزیم شراکت داری، تعلیمی تبادلوں اور آثارِ قدیمہ کے تحفظ کے شعبوں میں تعاون بڑھانے کی ضرورت پر زور دیا۔
خاتونِ اول کا کہنا تھا کہ دونوں ممالک قدیم تہذیبی ورثے کے حامل ہیں، جہاں پاکستان کی وادیٔ سندھ کی تہذیب اور بحرین کی دلمن تہذیب نمایاں تاریخی اہمیت رکھتی ہیں۔
ان کے مطابق ثقافتی ورثے کے تحفظ میں باہمی تعاون سے عوامی سطح پر روابط اور باہمی تفہیم مزید مضبوط ہو سکتی ہے۔
