سعودی عرب میں جنگلی حیات کے تحفظ اور قدرتی توازن کی بحالی کے لیے اہم قدم اٹھاتے ہوئے نیشنل سینٹر فار وائلڈ لائف (این سی ڈبلیو) نے کنگ سلمان بن عبدالعزیز رائل ریزرو میں 140 جنگلی جانور قدرتی ماحول میں چھوڑ دیے ہیں۔
NCW Releases 140 Wild Animals into King Salman Royal Reserve.https://t.co/9UxCG7ReQE#SPAGOV pic.twitter.com/cty9CzbzKE
— SPAENG (@Spa_Eng) February 5, 2026
سعودی گزٹ کی رپورٹ کے مطابق نیشنل سینٹر فار وائلڈ لائف نے کنگ سلمان بن عبدالعزیز رائل ریزرو ڈویلپمنٹ اتھارٹی کے تعاون سے خطرے سے دوچار جنگلی انواع کو دوبارہ قدرتی مسکن میں متعارف کرانے کا عمل مکمل کیا۔ اس مرحلے میں 30 عربی اوریکس، 70 ریم غزالیں (صحرائی غزال) اور 40 حبّارہ بسٹرڈز کو ریزرو میں چھوڑا گیا۔
یہ بھی پڑھیں:حیاتیاتی تنوع کا فروغ، سعودی عرب میں 35 نایاب جانوروں کی واپسی
این سی ڈبلیو کے مطابق اس اقدام کا مقصد جنگلی جانوروں کی ایسی مستحکم آبادی قائم کرنا ہے جو افزائش نسل کے قابل ہو اور قدرتی ماحولیاتی نظام کو بہتر بنانے میں مدد دے۔ ادارے کا کہنا ہے کہ اب تک مختلف پروگراموں کے تحت 10 ہزار سے زائد جانور قدرتی ماحول میں دوبارہ متعارف کرائے جا چکے ہیں۔
بیان میں کہا گیا ہے کہ یہ پیش رفت سعودی گرین انیشی ایٹو اور وژن 2030 کے اہداف کے مطابق ہے، جس کا مقصد مملکت میں حیاتیاتی تنوع کے تحفظ اور ماحول دوست پالیسیوں کو فروغ دینا ہے۔
