پاکستانی ٹیم نے جونیئر ایشیا ہاکی کپ کے سیمی فائنل کے لیے کوالیفائی کر لیا ہے، گرین شرٹس نے اپنے پول کے آخری میچ میں جاپان کو 3-2 سے شکست دیکر سیمی فائنل میں جگہ بنائی ہے۔
جونیئر ایشیا ہاکی کپ کے سنسنی خیز مقابلے عمان کے شہر صلالہ میں جاری ہیں۔ پاکستان کی جانب سے پہلا گول 23ویں منٹ میں پنالٹی کارنر پر ارباز احمد نے کیا، اس کے بعد 30ویں اور 39ویں منٹ میں عبدالوہاب نے 2 گول کرکے فتح کی بنیاد رکھی۔
کپتان محمد عبد اللہ نے شان دار کھیل کا مظاہرہ کیا تاہم عبدالوہاب پلیئر آف دی میچ قرار پائے۔ پاکستان نے اپنے 4 پول میچوں میں چائینز تائی پے، تھائی لینڈ اور جاپان کو شکست دی، جبکہ بھارت کے ساتھ سنسنی خیز مقابلہ ایک، ایک گول سے برابر رہا تھا۔
پاکستان 31 مئی کو ملائیشیا سے سیمی فائنل میچ کھیلے گا۔ قومی ٹیم کے منیجر اور ہیڈ کوچ حنیف خان نے کہا ہے کہ ٹیم کی کارکردگی شان دار نظر آرہی ہے، امید ہے سیمی فائنل بھی جیتیں گے۔ پاکستان ہاکی فیڈریشن (پی ایچ ایف) کے سیکریٹری سید حیدر حسین نے کہا ہے کہ ٹیم کا سیمی فائنل تک پہنچنا شاندار کارکردگی اور ٹیم سپرٹ کا نتیجہ ہے۔
یاد رہے کہ جونیئر ایشیا ہاکی کپ 23 مئی سے یکم جون تک عمان کے شہر صلالہ میں کھیلا جا رہا ہے۔ ایونٹ میں حصہ لینے والی 10 ٹیموں کو 2 پولز میں تقسیم کیا گیا ہے۔ پول اے میں چائینز تائی پے، بھارت، جاپان، پاکستان اور تھائی لینڈ شامل ہیں۔ پول بی میں میزبان عمان کے علاوہ بنگلہ دیش، کوریا، ملائیشیا اور ازبکستان شامل ہیں۔
