تقریباً 19 سال قبل پرتگال کے سیاحتی علاقے پرایا دا لوز سے لاپتا ہونے والی برطانوی بچی میڈلین میکین کا نام ایک بار پھر عالمی سطح پر زیرِ بحث آ گیا ہے، جب امریکی عدالت کی جانب سے جاری کردہ دستاویزات میں اس کا تذکرہ سامنے آیا ہے جو بدنام زمانہ مالیاتی مجرم جیفری ایپسٹین اور اس کی ساتھی گھیسلین میکسویل سے متعلق مقدمات کا حصہ ہیں۔
یہ بھی پڑھیں: بھارتی صحافی کی لاش سیپٹک ٹینک سے برآمد، معاملہ کیا ہے؟
امریکی محکمہ انصاف کی جانب سے منظرِ عام پر لائی گئی ان دستاویزات میں لاکھوں صفحات پر مشتمل عدالتی ریکارڈ، گواہوں کے بیانات اور شواہد شامل ہیں۔ ان میں ایک 2009 کی تاریخ کا بیان بھی موجود ہے جس میں ایک نامعلوم گواہ نے ایک بچی کا ذکر کیا ہے جس کی مشابہت میڈلین میکین سے بتائی گئی ہے۔
حکام کے مطابق اس بیان کی بنیاد پر میڈلین کی گمشدگی کو ایپسٹین یا میکسویل کے نیٹ ورک سے جوڑنے کا کوئی ٹھوس ثبوت موجود نہیں، اور نہ ہی اس انکشاف کے بعد کسی نئی تفتیش کا آغاز کیا گیا ہے۔ امریکی اور برطانوی حکام دونوں نے واضح کیا ہے کہ یہ محض ایک غیر تصدیق شدہ حوالہ ہے۔
دستاویز میں بتایا گیا ہے کہ ستمبر 2009 میں ایک شخص نے ایک سڑک پر چلتے ہوئے ایک عورت، ایک کم عمر لڑکی اور کچھ فاصلے پر ایک درمیانی عمر کے مرد کو دیکھا۔ گواہ کے مطابق لڑکی کی شکل میڈلین میکین سے ملتی جلتی تھی اور وہ مسلسل اپنے دائیں آنکھ پر ہاتھ رکھے ہوئے تھی۔ یہ بات اس لیے قابلِ ذکر سمجھی جارہی ہے کہ میڈلین کی دائیں آنکھ میں پیدائشی طور پر ایک نمایاں نشان موجود تھا۔
یہ بھی پڑھیں: برطانیہ میں 11 سالہ بچے نےسمندری مخلوق کی 202 ملین سالہ پرانی باقیات دریافت کر لیں
گواہ نے بعد ازاں یہ مشاہدہ ایک ویب سائٹ پر رپورٹ کیا، جبکہ برسوں بعد اسے دوبارہ اس وقت یاد آیا جب گھیسلین میکسویل سے متعلق خبریں سامنے آئیں۔
یاد رہے کہ میڈلین میکین 3 مئی 2007 کو پرتگال میں اپنے اہلخانہ کے ہمراہ چھٹیاں گزارنے کے دوران لاپتا ہوئی تھیں۔ اس وقت ان کی عمر 3 سال تھی۔ والدین قریبی ریسٹورنٹ میں موجود تھے جبکہ میڈلین اور اس کے جڑواں بہن بھائی اپارٹمنٹ میں سورہے تھے۔
واقعے کے بعد عالمی سطح پر تلاش کی مہم شروع کی گئی، سرحدی اداروں کو الرٹ کیا گیا اور متعدد ممکنہ علاقوں میں چھان بین ہوئی، تاہم اب تک میڈلین کا کوئی حتمی پتا نہیں چل سکا۔
یہ بھی پڑھیں: برطانیہ میں چاقو سے حملے میں 2 بچے ہلاک، 9 افراد زخمی
تازہ دستاویزات میں سامنے آنے والا ذکر اگرچہ سنسنی خیز ہے، مگر حکام کے مطابق اس سے کیس کی سمت میں کوئی باضابطہ تبدیلی نہیں آئی۔ میڈلین میکین کا معاملہ آج بھی جدید تاریخ کے سب سے پیچیدہ اور پراسرار لاپتا بچوں کے کیسز میں شمار ہوتا ہے۔
