بھارت کے شہر بنگلورو میں محبت کی شادی کا افسوسناک انجام سامنے آیا، جہاں شوہر نے مبینہ طور پر بیوی کو قتل کرنے کے بعد خودکشی کرلی۔
ریاست کرناٹک کے دارالحکومت میں پیش آنے والے اس واقعے نے علاقے میں خوف و ہراس پھیلا دیا ہے۔
پولیس کے مطابق 25 فروری (بدھ) کی رات ہیلالیگے گاؤں میں یہ افسوسناک واقعہ پیش آیا۔ اڈیشہ سے تعلق رکھنے والا جوڑا، دیپنت سبر اور منجولا سبر، تقریباً ایک سال قبل محبت کی شادی کے بندھن میں بندھا تھا۔ دونوں 3 ہفتے پہلے ہی ہیلالیگے گاؤں میں کرائے کے مکان میں منتقل ہوئے تھے۔
یہ بھی پڑھیے کوہاٹ میں ینگ ڈاکٹر کا قتل: ’خاتون ڈاکٹر نے خواتین وارڈ میں داخلے سے منع کیا جو اس کا قصور بنا‘
پولیس اور ذرائع کے مطابق میاں بیوی کے درمیان خاندان سے متعلق کسی معاملے پر شدید جھگڑا ہوا۔ جھگڑا بڑھتے بڑھتے ہاتھا پائی تک جا پہنچا۔
الزام ہے کہ دیپنت نے اپنی بیوی منجولا پر جسمانی تشدد کیا، جس کے نتیجے میں وہ موقع پر ہی دم توڑ گئیں۔
ویڈیو پیغام کے بعد خودکشی
پولیس کا کہنا ہے کہ واردات کے بعد دیپنت نے اپنے موبائل فون پر ایک ویڈیو پیغام ریکارڈ کیا۔ ویڈیو میں وہ مبینہ طور پر کہہ رہا ہے کہ وہ اپنی بیوی سے بے حد محبت کرتا ہے اور اس کے بغیر زندہ نہیں رہ سکتا۔
ویڈیو ریکارڈ کرنے کے بعد اس نے بھی اپنی جان لے لی۔
واقعہ 2 دن تک منظر عام پر نہ آ سکا۔ گھر کے مالک کو شک ہونے پر اس نے کھڑکی سے اندر جھانکا تو دونوں کی لاشیں دیکھ کر پولیس کو اطلاع دی۔
یہ بھی پڑھیے بیٹے نے کیریئر تنازع پر باپ کو قتل کردیا، لرزہ خیز انکشافات
پولیس موقع پر پہنچی اور لاشوں کو پوسٹ مارٹم کے لیے نجی اسپتال منتقل کردیا۔
تحقیقات میں نئے انکشافات
تحقیقات کے دوران معلوم ہوا کہ دیپنت بومسندرا میں ایک نجی کمپنی میں ملازمت کرتا تھا۔ پولیس کو شبہ ہے کہ منجولا کو دیپنت کی پہلی شادی اور اس سے ہونے والے 2 بچوں کے بارے میں علم نہیں تھا، جس پر دونوں کے درمیان تنازع جاری تھا۔
پولیس نے مقدمہ درج کرکے مختلف پہلوؤں سے تحقیقات شروع کردی ہیں۔ موبائل فون سے حاصل ہونے والی ویڈیو اور دیگر شواہد کا فرانزک جائزہ لیا جا رہا ہے۔
