پاکستان کرکٹ ٹیم کے کپتان شاہین شاہ آفریدی نے کہا ہے کہ بنگلہ دیش کے خلاف ون ڈے سیریز میں سابق کپتان بابر اعظم کو ڈراپ نہیں کیا گیا بلکہ ٹیم مینجمنٹ نوجوان کھلاڑیوں کو موقع دے کر مستقبل کے لیے تیار کرنا چاہتی ہے۔
انہوں نے کہا ہے کہ 3 ڈیبیو ہوں گے۔ صاحبزادہ فرحان اوپنر کے طور پر ٹیم کا حصہ ہوں گے، معاذ صداقت بھی بطور اوپنر میدان میں اتریں گے جبکہ شامل حسین ون ڈاؤن پوزیشن پربیٹنگ کریں گے۔
یہ بھی پڑھیں: بابر اعظم کی فارم پر کڑی تنقید، سابق کھلاڑی کیا کہتے ہیں؟
ان کا مزید کہنا تھا کہ تینوں کھلاڑی ڈومیسٹک کرکٹ میں شاندار کارکردگی دکھا چکے ہیں اور ٹیم کو امید ہے کہ وہ بین الاقوامی سطح پر بھی اپنی صلاحیتوں کا بھرپور مظاہرہ کریں گے۔
قومی کپتان نے واضح کیا کہ بابر اعظم کو اسکواڈ سے باہر کرنے کا فیصلہ کارکردگی کی بنیاد پر نہیں بلکہ نوجوان کھلاڑیوں کو مواقع دینے کی حکمت عملی کے تحت کیا گیا ہے۔ اس سیریز کے لیے کسی کھلاڑی کو ڈراپ نہیں کیا گیا۔ ہم چاہتے ہیں کہ نوجوان کھلاڑیوں کو موقع دیا جائے کیونکہ وہی ٹیم کا مستقبل ہیں اور آئندہ ورلڈ کپ کے لیے انہیں تیار کرنا ضروری ہے۔
یہ بھی پڑھیں: بابراعظم دنیا کے بہترین کھلاڑیوں میں سے ہیں ہم اس چیلنج کا بے صبری سے انتظار کر رہے ہیں، مچل مارش
شاہین آفریدی کا کہنا تھا کہ ٹیم کے چند کھلاڑی بنگلہ دیش پریمیئر لیگ میں کھیل چکے ہیں جس کی وجہ سے انہیں مقامی کنڈیشنز سے ہم آہنگ ہونے میں آسانی ہوگی۔
انہوں نے بنگلہ دیش کو ایک مضبوط حریف قرار دیتے ہوئے کہا کہ ہوم گراؤنڈ پر میزبان ٹیم ہمیشہ خطرناک ثابت ہوتی ہے اس لیے پاکستان سیریز کو سنجیدگی سے لے رہا ہے اور ٹیم پوری تیاری کے ساتھ میدان میں اترے گی۔
