بھارت کی ریاست اتر پردیش کے ضلع بہرائچ میں جنگلی ہاتھی کے حملے میں 80 سالہ خاتون ہلاک ہو گئی، جبکہ حالیہ ایک ماہ کے دوران یہ تیسرا مہلک واقعہ ہے جس کے بعد علاقے میں شدید خوف پھیل گیا ہے۔
یہ بھی پڑھیں:اسپین میں ہنی بال کے جنگی ہاتھی کے ممکنہ آثار دریافت
پولیس اور محکمہ جنگلات کے مطابق واقعہ کترنیہ گھاٹ وائلڈ لائف سینکچری کے قریب پیش آیا، جہاں بھوانی پور گاؤں کی رہائشی کووریہ دیوی بکریاں چرا رہی تھیں کہ اسی دوران ایک جنگلی ہاتھی نے ان پر حملہ کر دیا۔
حکام کے مطابق خاتون اپنی ایک بکری کی تلاش میں جنگل کے قریب گئی تھیں جب ہاتھی نے انہیں روند ڈالا، جس کے نتیجے میں وہ موقع پر ہی دم توڑ گئیں۔
یہ بھی پڑھیں:ہاتھیوں سے بچنے کے لیے دریا میں کودنے والا شخص مگرمچھ کا نوالہ بن گیا
مقامی افراد کا کہنا ہے کہ خاتون کی چیخ و پکار سن کر قریبی کسانوں نے ہاتھی کو بھگانے کی کوشش کی، تاہم وہ کچھ دیر تک وہیں موجود رہا اور بعد ازاں جنگل کی جانب واپس چلا گیا۔
دیہاتیوں کے مطابق یہی ہاتھی اسی صبح قریبی کھیتوں میں فصلوں کو بھی نقصان پہنچا چکا تھا۔
واقعے کے بعد پولیس اور محکمہ جنگلات کی ٹیمیں موقع پر پہنچ گئیں اور لاش کو پوسٹ مارٹم کے لیے منتقل کر دیا گیا۔ حکام نے متاثرہ خاندان کو فوری طور پر 10 ہزار روپے امداد فراہم کی ہے جبکہ سرکاری ضابطے کے تحت 5 لاکھ روپے معاوضے کی کارروائی بھی جاری ہے۔
حکام نے مقامی افراد کو محتاط رہنے کی ہدایت کی ہے، جبکہ اس واقعے کے بعد علاقے میں خوف و ہراس بڑھ گیا ہے کیونکہ فروری میں بھی 2 افراد اسی طرح کے حملوں میں جان کی بازی ہار چکے ہیں۔
