ملتان سلطانز کے تجربہ کار آسٹریلوی فاسٹ بولر پیٹر سڈل کا لقب ‘چاچا’ اب صرف کرکٹ کے میدان تک محدود نہیں رہا، بلکہ ان کی قریبی دوست نے بھی انہیں اسی نام سے مخاطب کرنا شروع کردیا ہے۔
یہ بھی پڑھیں: آسٹریلوی اسٹار اسٹیو اسمتھ کی پیٹر سڈل کو مزاحیہ انداز میں ’چاچا‘ کہنے کی ویڈیو وائرل
پاکستان سپر لیگ (پی ایس ایل) کے لاہور لیگ کے اختتام پر 41 سالہ پیٹر سڈل نے اپنی کچھ تصاویر سوشل میڈیا پر شیئر کیں۔ ان تصاویر پر جہاں مداحوں نے تبصرے کیے، وہی ان کی ایک دوست کا کمنٹ سب کی توجہ کا مرکز بن گیا جس نے سڈل کو ‘چاچا’ لکھ کر پکارا۔ یہ کمنٹ دیکھتے ہی دیکھتے وائرل ہو گیا۔
دلچسپ بات یہ ہے کہ پیٹر سڈل کو ‘چاچا’ کا لقب دینے والے کوئی اور نہیں بلکہ پاکستانی اسٹار فاسٹ بولر حارث رؤف تھے۔ انہوں نے آسٹریلوی بگ بیش لیگ (بی بی ایل) کے دوران سڈل کو اس نام سے پکارنا شروع کیا تھا، جو اب ان کی پہچان بن چکا ہے۔
یہ بھی پڑھیں: ’افتخار لوکل اور میں غیر ملکی چاچا ہوں‘، 41 سالہ پیٹر سیڈل کا پاکستان میں اپنے نام پر دلچسپ تبصرہ
حال ہی میں ایک پریس کانفرنس کے دوران پیٹر سڈل نے خود بھی اس بات کا تذکرہ کیا تھا۔ انہوں نے مسکراتے ہوئے انکشاف کیا کہ ’ملتان سلطانز کے ساتھی کھلاڑی بھی مجھے چاچا کہہ کر بلاتے ہیں۔ اب صورتحال یہ ہے کہ افتخار احمد ‘لوکل چاچا’ ہیں اور میں ‘غیر ملکی چاچا’ بن گیا ہوں۔‘
صرف یہی نہیں، بلکہ حال ہی میں ایک پوسٹ میچ گفتگو کے دوران آسٹریلوی بیٹر اسٹیو اسمتھ نے بھی پیٹر سڈل کو اسی دلچسپ لقب سے پکارا تھا، جس سے یہ ظاہر ہوتا ہے کہ اب پیٹر سڈل اس نام کو پوری طرح اپنا چکے ہیں۔
