اسٹیٹ بینک آف پاکستان نے تصدیق کی ہے کہ اسے مملکتِ سعودی عرب کی وزارتِ خزانہ کی جانب سے 2 ارب امریکی ڈالر کی رقم موصول ہوئی ہے، جو 15 اپریل 2026 کی ویلیو ڈیٹ کے مطابق اسٹیٹ بینک کے اکاؤنٹس میں منتقل کی گئی۔
یہ پیشرفت ایسے وقت میں سامنے آئی ہے جب پاکستان کی معاشی اصلاحات اور استحکام کو بین الاقوامی سطح پر سراہا جا رہا ہے۔
State Bank of Pakistan has received funds of US$2 billion from Ministry of Finance, Kingdom of Saudi Arabia in the value date of 15April2026.
— SBP (@StateBank_Pak) April 16, 2026
عالمی مالیاتی ادارے آئی ایم ایف کی منیجنگ ڈائریکٹر کرسٹالینا جورجیوا نے پاکستان کی معاشی اصلاحات اور پالیسی اقدامات کی تعریف کرتے ہوئے کہا ہے کہ اصلاحاتی پروگرام پر مؤثر عملدرآمد کے باعث پاکستان میں معاشی استحکام برقرار رہا ہے اور سرمایہ کاروں کا اعتماد بھی بہتر ہوا ہے۔
انہوں نے یہ بات ورلڈ بینک اور آئی ایم ایف کے بہار اجلاس 2026 کے موقع پر وفاقی وزیر خزانہ سینیٹر محمد اورنگزیب سے ملاقات کے دوران کہی۔ ان کے مطابق پاکستان کی مضبوط معاشی پالیسیوں کے ساتھ ساتھ ساختی اصلاحات کا تسلسل مستقبل میں پائیدار ترقی اور عوامی فلاح کے لیے انتہائی اہم ہے۔
ماہرین کے مطابق سعودی عرب سے موصول ہونے والی یہ مالی معاونت اور عالمی مالیاتی اداروں کی جانب سے مثبت اشارے پاکستان کی معیشت کے لیے اعتماد میں اضافے کا باعث بن رہے ہیں۔
