پاکستان، سعودی عرب اور ترکیہ سمیت دیگر مسلم ممالک نے اسرائیل کی جانب سے نام نہاد صومالی لینڈ میں سفارتی نمائندہ مقرر کرنے کے اعلان کی شدید مذمت کرتے ہوئے اسے مسترد کردیا ہے۔
ترجمان دفتر خارجہ کے مطابق پاکستان، مصر، صومالیہ، سوڈان، لیبیا، بنگلہ دیش، الجزائر، سعودی عرب، فلسطین، ترکیہ، انڈونیشیا اور کویت کے وزرائے خارجہ نے اس اقدام کو صومالیہ کی خودمختاری، وحدت اور علاقائی سالمیت کی کھلی خلاف ورزی قرار دیا ہے۔
وزرائے خارجہ نے اس عزم کا اعادہ کیاکہ وہ کسی بھی ایسے یکطرفہ اقدام کو مسترد کرتے ہیں جو ریاستوں کی وحدت کو نقصان پہنچائے یا ان کی خودمختاری پر ضرب لگائے۔
انہوں نے صومالیہ کی خودمختاری، اتحاد اور علاقائی سالمیت کے ساتھ مکمل اور غیر متزلزل حمایت کا بھی اظہار کیا، اور اس کے قانونی ریاستی اداروں کو صومالی عوام کی واحد نمائندگی قرار دیا۔
مشترکہ اعلامیے میں مزید کہا گیا کہ اسرائیل کا یہ اقدام بین الاقوامی قوانین، اقوام متحدہ کے چارٹر اور افریقی یونین کے بنیادی اصولوں کی صریح خلاف ورزی ہے۔
بیان میں کہا گیا ہے کہ اس طرح کے اقدامات افریقہ کے خطے میں عدم استحکام کو بڑھا سکتے ہیں، جس کے منفی اثرات علاقائی امن و سلامتی پر مرتب ہوں گے۔
