بالی ووڈ کے مشہور جوڑے ارچنا پورن سنگھ اور پرمیت سیٹھی کے چھوٹے بیٹے آیوشمان سیٹھی مبینہ طور پر ایک کریڈٹ کارڈ فراڈ کا شکار ہو گئے ہیں جس کے نتیجے میں انہیں 87 ہزار روپے (تقریباً 3,800 درہم) کا مالی نقصان برداشت کرنا پڑا۔ یہ واقعہ ان کے بڑے بھائی آریامان سیٹھی کی یوٹیوب ویڈیو کے ذریعے منظرِ عام پر آیا۔
ویڈیو میں دی گئی معلومات کے مطابق آیوشمان نے اپنے کریڈٹ کارڈ اسٹیٹمنٹ میں ایک چارج دیکھا اور فوری طور پر اہلِ خانہ کو آگاہ کیا۔ ان کا کہنا تھا کہ انہوں نے ایک سات روزہ ’فری ٹرائل‘ کے لیے سائن اپ کیا تھا تاہم بعد ازاں انہیں اطلاع کے بغیر پورے ایک سال کی فیس ایک ساتھ چارج کر دی گئی۔
یہ بھی پڑھیں: شوہر نے ساتھ دیا ہوتا تو مالی ضرورت کے لیے سی گریڈ فلمیں نا کرنی پڑتیں، ارچنا پورن سنگھ کا اعتراف
وی لاگ میں آیوشمان کو پریشانی کے عالم میں صورتحال بیان کرتے اور اس ٹرانزیکشن کو واپس کروانے کی کوشش کرتے ہوئے دیکھا گیا۔ اس موقع پر رچنا پورن سنگھ نے فوری طور پر بینک سے رابطہ کرنے اور مسئلے کے حل کے لیے کارروائی کرنے کی ہدایت کی جبکہ پرمیت سیٹھی نے واضح کیا کہ کارڈ بند کرنے کے بجائے متعلقہ ادائیگی کو چیلنج کرنا زیادہ مناسب اقدام ہوگا۔
آیوشمان نے بتایا کہ وہ فوری طور پر بینک سے رابطہ کرنے کی کوشش کرتے رہے، تاہم انہیں مشکلات کا سامنا کرنا پڑا جس کے باعث معاملہ حل کرنے میں تاخیر ہوئی۔
یہ بھی پڑھیں: پہلگام فالس فلیگ: بھارتی رپورٹر ارچنا تیواری نے حیران کن زمینی حقائق بے نقاب کر دیے
یہ پہلا موقع نہیں ہے کہ آیوشمان سیٹھی کو مالی نقصان کا سامنا کرنا پڑا ہو۔ ان کے بھائی آریامان کے مطابق اس سے قبل بھی ایک واقعے میں ان کے پلے اسٹیشن اکاؤنٹ سے تقریباً 80 ہزار روپے بغیر اجازت کٹ گئے تھے جس کی رقم تاحال واپس نہیں مل سکی۔
آیوشمان سیٹھی نے مؤقف اختیار کیا ہے کہ حالیہ چارج غیر مجاز تھا اور انہوں نے کسی بھی سالانہ ادائیگی کی منظوری نہیں دی تھی۔ وہ اس وقت بھی اپنے بینک کے ساتھ رابطے میں ہیں تاکہ اس معاملے کی جانچ پڑتال اور ممکنہ رقم کی واپسی کو یقینی بنایا جا سکے۔
