نامور پاکستانی گلوکار سجاد علی سے متعلق سوشل میڈیا پر گردش کرنے والی خبروں نے مداحوں کی توجہ حاصل کر لی ہے جن میں ان کی بیرونِ ملک رہائش اور حب الوطنی سے جڑے ایک واقعے کا ذکر کیا جا رہا ہے۔
سجاد علی کے ایک قریبی دوست نے حال ہی میں ایک پوڈکاسٹ میں انکشاف کیا ہے کہ دبئی میں قیام کے دوران ایک بھارتی افسر نے سجاد علی کو بھارتی شہریت اختیار کرنے کی پیشکش کی تھی جس پر سجاد علی نے فوری اور دوٹوک جواب دیتے ہوئے کہا میں نے اپنا ملک چھوڑا ہے بیچا نہیں۔
یہ بیان سامنے آنے کے بعد مداحوں کی جانب سے سجاد علی کی حب الوطنی کو سراہا جا رہا ہے اور سوشل میڈیا پر ان کے حق میں مثبت ردِعمل دیکھنے میں آ رہا ہے۔
سجاد علی پاکستان کے معروف اور لیجنڈری گلوکار ہیں جنہوں نے 1990 کی دہائی میں اپنے کیریئر کا آغاز کیا اور اپنی منفرد آواز اور موسیقی کی بدولت جلد ہی شہرت کی بلندیوں پر پہنچ گئے۔ ان کی گائیکی کو نہ صرف پاکستان بلکہ دنیا بھر میں سراہا جاتا ہے۔ رپورٹس کے مطابق سجاد علی گزشتہ چند برسوں سے امریکا کے شہر لاس اینجلس، کیلیفورنیا میں مقیم ہیں۔
