نیشنل سائبر کرائم انویسٹی گیشن ایجنسی (این سی سی آئی اے) نے اہم شخصیات اور شہریوں کا حساس ڈیٹا بیرون ملک فروخت کرنے میں ملوث ایک گینگ کو جنوبی پنجاب سے گرفتار کرلیا، جبکہ متعدد افراد کے خلاف تحقیقات جاری ہیں۔
میڈیا رپورٹس کے مطابق ڈی جی این سی سی آئی اے سید خرم علی نے اسلام آباد میں پریس کانفرنس کرتے ہوئے کہا کہ گرفتار گینگ اہم شخصیات اور شہریوں کی خفیہ معلومات چند ہزار روپے کے عوض بیرون ملک ایجنسیوں کو فروخت کر رہا تھا۔ انہوں نے بتایا کہ اب تک چار افراد کو حراست میں لیا جا چکا ہے۔
یہ بھی پڑھیں:سائبر کرائم سے ہوشیار: اسلام آباد پولیس نے جعلی لنکس اور ایپس کے حوالے سے الرٹ جاری کردیا
ڈی جی این سی سی آئی اے کے مطابق تحقیقات میں انکشاف ہوا ہے کہ مختلف اداروں سے وابستہ بعض افراد بھی ڈیٹا لیک میں سہولت کاری کر رہے تھے۔ ان کا کہنا تھا کہ ایسا حساس ڈیٹا فروخت کیا گیا جو ملکی سلامتی اور اہم شخصیات کی سکیورٹی سے متعلق تھا۔
سید خرم علی نے کہا کہ شہریوں کے ذاتی ڈیٹا کے تحفظ کے معاملے پر زیرو ٹالرنس پالیسی اپنائی گئی ہے اور تمام متعلقہ اداروں کو ہدایت کی جا رہی ہے کہ ڈیٹا لیک میں ملوث افراد کے خلاف فوری کارروائی کی جائے۔
انہوں نے بتایا کہ این سی سی آئی اے نے اسٹیٹ بینک کے تعاون سے کراچی میں خصوصی کمیٹی قائم کر رکھی ہے، جس نے بینکنگ اور شناختی معلومات لیک کرنے والے مختلف گروہوں کی نشاندہی کی ہے۔ ان کے مطابق زیادہ تر معلومات وہ افراد لیک کرتے ہیں جنہیں اداروں کے ڈیٹا بیس تک رسائی حاصل ہوتی ہے۔
ڈی جی این سی سی آئی اے نے مزید کہا کہ سرکاری افسران سمیت تمام ملوث عناصر کے خلاف کارروائی جاری ہے، تاہم شہریوں میں سائبر سکیورٹی سے متعلق آگاہی پیدا کرنا بھی انتہائی ضروری ہے۔
پریس کانفرنس کے دوران اداکارہ مومنہ اقبال کے ہراسانی کیس سے متعلق سوال پر سید خرم علی نے کہا کہ این سی سی آئی اے نے اس معاملے میں کسی قسم کی تاخیر نہیں کی اور جیسے ہی مومنہ اقبال لاہور پہنچیں، کارروائی کا آغاز کر دیا گیا۔
