پاکستان ایئرپورٹس اتھارٹی (پی اے اے) نے ملک بھر میں غیر فعال ہوائی اڈوں کو دوبارہ فعال کرنے اور فضائی رابطوں کے دائرہ کار کو وسعت دینے کے لیے بحالی کے عمل میں تیزی لانے کا فیصلہ کیا ہے۔
مزید پڑھیں: مشرقِ وسطیٰ کشیدگی: پروازیں معطل، ہزاروں بنگلہ دیشی محنت کش پھنس گئے
ذرائع کے مطابق کراچی میں پی اے اے ہیڈکوارٹرز میں ہونے والے ایک اعلیٰ سطح اجلاس میں اس حوالے سے اہم فیصلے کیے گئے۔ اجلاس کی صدارت ڈائریکٹر جنرل پاکستان ایئرپورٹس اتھارٹی ایئر وائس مارشل ذیشان سعید نے کی، جبکہ ایئرپورٹ سروسز، انجینئرنگ سروسز اور کمرشل شعبوں کے سینئر افسران بھی شریک ہوئے۔
اجلاس میں ڈیرہ اسماعیل خان، تربت، دالبندین اور سیدو شریف کے ہوائی اڈوں کی بحالی اور دوبارہ آپریشنل بنانے کے عمل کو ترجیحی بنیادوں پر مکمل کرنے کی ہدایت کی گئی۔ اس کے علاوہ سکھر، نیو گوادر اور دیگر فضائی تنصیبات پر آپریشنز کی بحالی سے متعلق امور کا بھی جائزہ لیا گیا۔
ذرائع کا کہنا ہے کہ وزارتِ دفاع اور پاکستان ایئرپورٹس اتھارٹی حالیہ عرصے سے غیر فعال فضائی ڈھانچے کی بحالی اور دور دراز علاقوں کو فضائی سہولتوں سے جوڑنے کے لیے اقدامات کر رہے ہیں۔ اسی سلسلے میں رواں ماہ ڈیرہ اسماعیل خان ہوائی اڈے کو کئی برس بعد دوبارہ فعال کیا گیا ہے۔
اجلاس کو بتایا گیا کہ وزارتِ دفاع نے ملک بھر کے تمام غیر فعال ہوائی اڈوں کی بحالی کا عمل جلد از جلد مکمل کرنے کی ہدایت جاری کر رکھی ہے تاکہ اندرونِ ملک فضائی سفر کو فروغ دیا جا سکے اور علاقائی رابطوں میں بہتری لائی جا سکے۔
مزید پڑھیں:شام کی معیشت کی بحالی: سعودی عرب کا بڑے پیمانے پر سرمایہ کاری کا اعلان
اجلاس میں ایک نئی نجی فضائی کمپنی سے متعلق معاملات کا بھی جائزہ لیا گیا، تاہم اس حوالے سے مزید تفصیلات سامنے نہیں آئیں۔
واضح رہے کہ پاکستان ایئرپورٹس اتھارٹی کا قیام 9 اگست 2024 کو جاری کردہ قانونی نوٹیفکیشن کے تحت عمل میں لایا گیا تھا، جس کا مقصد ملک کے ہوائی اڈوں اور متعلقہ خدمات کے انتظام، آپریشن اور ترقی کو مزید مؤثر بنانا ہے۔
