میر خلیل الرحمان سوسائٹی کے زیرِ اہتمام ’دہشت گردی کا سدباب اور فوج کا کردار‘ کے عنوان سے منعقدہ سیمینار میں مقررین نے دہشتگردی کے خاتمے، قومی اداروں کے احترام اور افواجِ پاکستان کے کردار پر اظہار خیال کرتے ہوئے اس بات پر زور دیا کہ ملک کو درپیش چیلنجز سے نمٹنے کے لیے قومی یکجہتی ناگزیر ہے۔
’افواج پاکستان قوم کا فخر، وقار پر حملہ برداشت نہیں کیا جائےگا‘
سیمینار سے خطاب کرتے ہوئے اسپیکر پنجاب اسمبلی ملک محمد احمد خان نے کہا کہ افواجِ پاکستان قوم کا سرمایہ اور فخر ہیں، اس لیے کسی کو بھی ان کے وقار کو مجروح کرنے کی اجازت نہیں دی جا سکتی۔
ہر پاکستانی اپنی افواج کی عزت اور وقار کے لیے متحد! اسپیکر پنجاب ملک احمد خان pic.twitter.com/L6Zg0RMhNr
— WE News (@WENewsPk) July 18, 2026
ان کا کہنا تھا کہ بھارتی خفیہ ایجنسی ’را‘ پاکستان کے خلاف سرگرم عناصر کی پشت پناہی کر رہی ہے۔
انہوں نے کہاکہ اگرچہ فوج کے سیاسی کردار پر تنقید کی جاتی ہے، تاہم ماضی میں ہونے والے سیاسی فیصلوں کو بھی نظرانداز نہیں کیا جا سکتا۔
انہوں نے مزید کہاکہ مولانا فضل الرحمان ایک قابل احترام سیاسی رہنما ہیں، لیکن شہدا سے متعلق اپنے بیان پر انہیں معذرت کرنی چاہیے۔
بھارت کی دہشتگردی پورے خطے کے لیے خطرہ ہے، رانا قاسم نون
چیئرمین کشمیر کمیٹی رانا قاسم نون نے اپنے خطاب میں کہاکہ پوری قوم افواج پاکستان کے شانہ بشانہ کھڑی ہے۔
انہوں نے کہاکہ بھارت کی سرپرستی میں ہونے والی دہشت گردی سے نہ صرف پاکستان بلکہ دیگر ممالک بھی متاثر ہو رہے ہیں۔
دہشت گردی سے نمٹنے کے لیے خود احتسابی ضروری ہے، عمران نذیر
پنجاب کے وزیر صحت خواجہ عمران نذیر نے کہا کہ دہشتگردی جیسے پیچیدہ چیلنج کا مؤثر مقابلہ کرنے کے لیے سب سے پہلے ہمیں اپنا احتساب کرنا ہوگا اور اپنی کمزوریوں کا جائزہ لینا ہوگا۔
قومی اداروں کا احترام ترقی کی ضمانت ہے، خواجہ فرحان
ڈی جی سول سروسز اکیڈمی خواجہ فرحان نے کہا کہ کسی بھی ملک کی ترقی کے لیے ضروری ہے کہ اس کے تمام قومی اداروں کا احترام کیا جائے اور ان پر اعتماد کو فروغ دیا جائے۔
سیمینار سے چیف کوآرڈی نیٹر ایکس سروس مین سوسائٹی عزیز احمد اعوان، ریئر ایڈمرل (ر) نوید احمد رضوی، میجر جنرل (ر) محمد نعیم، سینئر صحافی واصف ناگی سمیت دیگر مقررین نے بھی خطاب کیا اور دہشتگردی کے خلاف قومی اتفاق رائے اور ریاستی اداروں کے کردار پر اپنے خیالات کا اظہار کیا۔
