وزیراعظم شہباز شریف فرانس کے صدر ایمانوئل میکرون کی دعوت پر 22 سے 23 جون کو پیرس کا دورہ کریں گے، وزیراعظم پیرس میں منعقد ہونے والی نیو گلوبل فنانسنگ کانفرس میں بھی شرکت کریں گے، سربراہی اجلاس عالمی رہنماؤں کو نئے عالمی تناظر میں تبادلہ خیال کا موقع فراہم کرتا ہے۔
ترجمان دفترخارجہ کے مطابق سربراہی اجلاس میں پائیدار ترقی، ماحولیات اور توانائی کی منتقلی پر تبادلہ خیال کیا جائے گا، سربراہی اجلاس موسمیاتی تبدیلی کے ایجنڈے سے متعلق چیلنجز کا مقابلہ کرنے کی صلاحیت بھی رکھتا ہے۔ اجلاس کا مقصد بین الاقوامی مالیاتی نظام کی جامع اصلاحات کے لیے درکار اصولوں اور اقدامات کی وضاحت کرنا بھی ہے۔
پاکستان اس عالمی مباحثے میں ایک سرکردہ فریق کی حیثیت رکھتا ہے، پاکستان موسمیاتی تبدیلی کی وجہ سے متاثر ہونے والے سب سے بڑے ترقی پذیر ملک کے طور پر بحث میں حصہ لے گا۔ وزیراعظم بین الاقوامی مالیاتی اداروں میں اصلاحات، موسمیاتی فنانس، گرین انفراسٹرکچر، پائیدار ترقی کے اہداف کے حصول اور قرضوں سے متعلق مسائل کے حل کے حوالے سے بھی پاکستان کا نقطہ نظر اور تجاویز پیش کریں گے۔
وزیراعظم شہباز شریف سربراہی اجلاس کے موقع پر دیگر عالمی رہنماؤں سے دوطرفہ ملاقاتیں بھی کریں گے۔
