قومی کرکٹ ٹیم کے سابق کپتان عامر سہیل نے پاکستان کرکٹ بورڈ کی مینجمنٹ کمیٹی کو کام کرنے سے روکنے کے لیے وزارت بین الصوبائی رابطہ سمیت پی سی بی کے چیف الیکشن کمشنر کو قانونی نوٹس بھیجتے ہوئے موقف اختیار کیا ہے کہ نجم سیٹھی کی سربراہی میں مینجمنٹ کمیٹی کی مدت ختم ہوچکی ہے لہذا کمیٹی جو بھی اقدام اٹھائے گی وہ غیر قانونی ہوگا۔
بائیں ہاتھ سے کھیلنے والے اوپننگ بلے باز عامر سہیل نے اپنے قانونی نوٹس میں کہا ہے کہ نجم سیٹھی کی سربراہی میں پی سی بی کی مینجمنٹ کمیٹی غیر فعال ہوگئی ہے۔ ’دو مہینے کا وقت ملا تھا اور وہ وقت 19 جولائی کو ختم ہوگیا ہے۔ مینجمنٹ کمیٹی جو بھی اقدام اٹھائے گی وہ غیر قانونی ہوگا۔‘
وزیر برائے بین الصوبائی رابطہ، سیکریٹری اور پی سی بی کے چیف الیکشن کمشنر کے نام اپنے قانونی نوٹس میں، عامر سہیل نے مینجمنٹ کمیٹی کے سابق سربراہ کو کام کرنے سے روکنے کی درخواست کی ہے۔ ان کا کہنا ہے کہ مدت ختم ہونے کے بعد اٹھائے گئے اقدامات کی کوئی قانونی حیثیت نہیں ہوگی۔
’بطور سابق ٹیسٹ کرکٹر، پاکستان اور بیرون ملک کرکٹ کے بہتری اور فلاح میرا مقصد ہے۔ پی سی بی کے امور قانون کے مطابق چلائے جانے چاہئیں۔‘
