راولپنڈی کی انسداد دہشتگردی عدالت (اے ٹی سی) نے 9 مئی جی ایچ کیو حملہ کیس میں 47 اشتہاری مجرموں کو 10،10 سال قید کی سزا سنا دی۔
اے ٹی سی نے 9 مئی جی ایچ کیو حملہ کیس میں 47 اشتہاری مجرمان کا ٹرائل مکمل ہونے کے بعد فیصلہ جاری کردیا۔
مزید پڑھیں: 9 مئی واقعات: وزیر اعلیٰ خیبرپختونخوا سہیل آفریدی و دیگر کی موجودگی کی تصدیق
فیصلے کے مطابق تمام مجرموں کو 10،10 سال قید کی سزا سنائی گئی جبکہ ان کی جائیداد ضبط کرنے کا بھی حکم دیا گیا۔
پراسیکیوشن کی جانب سے 19 گواہان کے بیانات ریکارڈ کروائے گئے اور تمام 47 اشتہاری مجرمان کا الگ الگ ٹرائل کیا گیا۔
انسداد دہشتگردی عدالت کے جج امجد علی شاہ نے فیصلہ سناتے ہوئے کہا کہ سزا پانے والے مجرم 9 مئی کے واقعات کی سازش میں ملوث پائے گئے۔
فیصلے میں مزید کہا گیا کہ جے آئی ٹی نے ان افراد کو 9 مئی کے واقعات کی منصوبہ بندی میں مرکزی ملزم قرار دیا تھا۔
عدالتی فیصلے کے مطابق سزا پانے والوں میں عمر ایوب، زرتاج گل، شیخ راشد، مراد سعید، زلفی بخاری، علی امین گنڈاپور، شاندانہ گلزار، شہباز گل، حماد اظہر، اعظم سواتی، احمد چٹھہ، رائے حسن نواز، رائے مرتضیٰ، شوکت علی بھٹی، عثمان سعید بسرا، اعجاز خان جازی، شبلی فراز اور کنول شوزب اور دیگر شامل ہیں۔
مقدمے میں 118 ملزمان میں سے 18 کو دوران ٹرائل اشتہاری قرار دیا گیا، جبکہ 29 ملزمان مقدمے کے اندراج کے بعد کسی عدالت میں پیش نہیں ہوئے۔ مقدمے میں اب تک استغاثہ کے مجموعی طور پر 44 گواہان کے بیانات قلمبند کیے جاچکے ہیں۔
مزید پڑھیں: 9 مئی کیس میں بریت کے بعد شاہ محمود قریشی اور پی ٹی آئی کا مستقبل کیا ہے؟
عدالت کے مطابق ملزمان جی ایچ کیو گیٹ، حمزہ کیمپ اور آرمی میوزیم پر حملوں میں ملوث پائے گئے۔ ان پر جلاؤ گھیراؤ، توڑ پھوڑ اور اہم سرکاری عمارتوں اور مقامات کو نقصان پہنچانے کے الزامات بھی عائد کیے گئے تھے۔
