ٹی وی اینکر اور تجزیہ کار منیب فاروق نے اپنے تازہ یوٹیوب وی لاگ میں عمران خان کے بیٹوں قاسم خان اور سلیمان خان کے پاکستان آنے سے متعلق نائیکوپ اور ویزے کے معاملے پر گفتگو کی ہے۔
مزید پڑھیں: تحریکِ انصاف کی پاکستان مخالف تقریریں اور جی ایس پی پلس معاملے پر قاسم خان اور سلیمان کی مہم
منیب فاروق نے کہا کہ عمران خان کے بیٹوں نے حالیہ انٹرویو میں پاکستان آنے کے حوالے سے مشکلات کا ذکر کیا، تاہم حکومت کی جانب سے دونوں کے نائیکوپ سے متعلق ریکارڈ اور نمبرز سامنے لائے گئے ہیں۔ ان کے مطابق نائیکوپ کی تفصیلات اور تاریخِ تنسیخ بھی ظاہر کی گئی ہیں، جس سے یہ سوال پیدا ہوتا ہے کہ دونوں کے پاکستان آنے میں اصل رکاوٹ کیا ہے۔
اینکر نے کہا کہ عمران خان کی بہن علیمہ خان کی جانب سے یہ مؤقف سامنے آیا ہے کہ ایک بیٹے کا نائیکوپ گم ہوگیا ہے۔ منیب فاروق کے مطابق اگر نائیکوپ گم ہوگیا ہے تو اس کے دوبارہ اجرا کے لیے درخواست دی جاسکتی ہے اور یہ کوئی ایسا معاملہ نہیں جس کا حل ممکن نہ ہو۔ ان کا کہنا تھا کہ انہیں نہیں لگتا کہ حکومت نیا نائیکوپ جاری کرنے سے انکار کرے گی۔
منیب فاروق نے مزید کہا کہ کبھی ویزے کا معاملہ سامنے آتا ہے اور کبھی کسی اور رکاوٹ کی بات کی جاتی ہے، حالانکہ ان کے مطابق اگر نائیکوپ موجود اور فعال ہے تو پاکستان آنے کے لیے ویزے کے معاملے پر بھی وضاحت ضروری ہے۔ قاسم اور سلیمان نے پاکستان آنے کی خواہش ظاہر کرتے ہوئے ویزوں سے متعلق مشکلات کا دعویٰ کیا تھا۔
مزید پڑھیں:قاسم اور سلیمان نے برطانوی پاسپورٹ پر ویزے کیلئے اپلائی کیا، حکومت روک نہیں سکتی، علیمہ خان
تاہم نائیکوپ کے معاملے پر اپنے بیان میں علیمہ خان نے کہا تھا کہ ایک بیٹے کا نائیکوپ آئندہ کئی برس تک قابلِ استعمال ہے، جبکہ دونوں نے ویزے کے لیے بھی درخواست دی ہے۔
