آزاد کشمیر میں نئی حکومت کے قیام کے بعد مسلم لیگ (ن) کی جانب سے ڈاکٹر محمد نجیب نقی خان کو صدر آزاد کشمیر کے لیے امیدوار نامزد کیے جانے کو ریاست کے تینوں ڈویژنوں کی نمائندگی میں توازن کے تناظر میں اہم سیاسی پیشرفت قرار دیا جا رہا ہے۔
مسلم لیگ (ن) کے صدر نواز شریف نے ڈاکٹر محمد نجیب نقی خان کو صدر آزاد کشمیر کے منصب کے لیے نامزد کرتے ہوئے انہیں کاغذات نامزدگی جمع کرانے کی ہدایت کی ہے۔
پنجاب کی سینیئر وزیر مریم اورنگزیب نے بھی ڈاکٹر نجیب نقی کی نامزدگی کی تصدیق کرتے ہوئے انہیں مبارکباد دی ہے۔
ڈاکٹر نجیب نقی کا تعلق پونچھ ڈویژن کے ضلع سدھنوتی کے حلقہ پلندری سے ہے۔ ان کی نامزدگی ایسے وقت میں سامنے آئی ہے جب آزاد کشمیر میں نئی حکومت کے قیام کے بعد ریاست کے اہم آئینی عہدوں کی تقسیم مکمل ہونے کے مرحلے میں ہے۔
موجودہ سیاسی ترتیب میں وزیراعظم آزاد کشمیر کا تعلق مظفرآباد ڈویژن سے ہے، جبکہ قانون ساز اسمبلی کے اسپیکر چوہدری طارق فاروق کا تعلق میرپور ڈویژن سے ہے۔ اب صدر کے لیے پونچھ ڈویژن سے ڈاکٹر نجیب نقی خان کے نام کا انتخاب سامنے آنے کے بعد تینوں ڈویژنوں کو ریاست کے اہم آئینی عہدوں میں نمائندگی ملنے کا پہلو نمایاں ہوگیا ہے۔
سیاسی حلقوں میں اس ترتیب کو مسلم لیگ (ن) کی جانب سے آزاد کشمیر کے مختلف خطوں کو ساتھ لے کر چلنے کی کوشش کے طور پر دیکھا جا رہا ہے۔ اس نقطہ نظر کے مطابق حکومت تشکیل دینا ایک اہم مرحلہ ہوتا ہے، تاہم مختلف علاقوں کو ریاستی نظام میں نمائندگی دینا اور علاقائی توازن برقرار رکھنا بھی حکومت اور سیاسی قیادت کے لیے اہم معاملہ ہوتا ہے۔
ڈاکٹر نجیب نقی خان کا تعلق پونچھ ڈویژن سے ہے اور وہ اس خطے میں طویل سیاسی سفر رکھتے ہیں۔ ان کی نامزدگی کو اس تناظر میں بھی اہم قرار دیا جا رہا ہے کہ ریاست کے اس حصے کو اعلیٰ آئینی منصب کے لیے نمائندگی دی گئی ہے۔
آزاد کشمیر میں صدارتی منصب گزشتہ چند ماہ سے خالی تھا۔ سابق صدر بیرسٹر سلطان محمود چوہدری کے انتقال کے بعد یہ عہدہ قائم مقام صدر کے ذریعے چلایا جاتا رہا، جبکہ اب نئے صدر کے انتخاب کا آئینی عمل آگے بڑھ رہا ہے۔
آزاد کشمیر الیکشن کمیشن کے مطابق صدر کا انتخاب 24 ستمبر کو قانون ساز اسمبلی سیکریٹریٹ مظفرآباد میں ہوگا۔
ڈاکٹر نجیب نقی خان کی نامزدگی کے بعد آزاد کشمیر میں نئی حکومت کے قیام کے بعد اہم آئینی عہدوں کی تشکیل کا مرحلہ بھی مکمل ہونے کے قریب پہنچ گیا ہے۔
مسلم لیگ (ن) پہلے ہی چوہدری طارق فاروق کو اسپیکر اور افتخار گیلانی کو وزیراعظم منتخب کرا چکی ہے، جبکہ اب صدارت کے لیے پونچھ ڈویژن سے ڈاکٹر نجیب نقی کا نام سامنے آیا ہے۔
سیاسی تجزیہ کاروں کے مطابق ریاست کے تین اہم عہدوں پر نامزدگیوں میں تینوں ڈویژنز کو نمائندگی دے کر نواز شریف نے درست فیصلہ کیا ہے۔
