بالی ووڈ کی معروف جوڑی دیپیکا پڈوکون اور رنویر سنگھ کے ہاں ایک اور بیٹی کی پیدائش ہوئی ہے، جس کے بعد ان کا خاندان چار افراد پر مشتمل ہوگیا۔
جوڑے نے ہفتہ 19 ستمبر کو اپنی دوسری بیٹی کی پیدائش کا اعلان کرتے ہوئے انسٹاگرام پر نومولود بچی کے ننھے پاؤں کی تصویر شیئر کی۔ تصویر کے ساتھ انہوں نے لکھا، ’خوش آمدید بیٹی‘ اور پیدائش کی تاریخ 19 ستمبر 2026 درج کی۔
View this post on Instagram
دیپیکا اور رنویر نے پیغام کے اختتام پر اپنی پہلی بیٹی دعا کے ساتھ اپنے نام بھی نام لکھے اور نظر بد سے بچاؤ کے لیے نظر بد والا ایموجی بھی شامل کیا۔
جوڑے کی پہلی بیٹی دعا 8 ستمبر 2024 کو پیدا ہوئی تھی، جو اب اپنی چھوٹی بہن کے ساتھ پرورش پائے گی۔
دوسری بیٹی کی پیدائش کی خبر سامنے آتے ہی بالی ووڈ میں بھی خوشی کی لہر دوڑ گئی اور جوڑے کے دوستوں اور ساتھی فنکاروں نے مبارکباد کے پیغامات دینا شروع کردیے۔
فلم ’ممی‘ کی اداکارہ کریتی سینن نے مبارکباد دیتے ہوئے لکھا، ’اوہ! آپ دونوں کو مبارک ہو، دعا کو ایک چھوٹی بہن مل گئی، یہ واقعی بہت بڑی نعمت ہے۔‘
معروف گلوکارہ شریہ گوشال نے بھی جوڑے کو مبارکباد دی، جبکہ اداکار انگد بیدی نے دعائیہ انداز میں لکھا، ’بابا سکھ رکھے، ایک اور دیوی۔‘
دیپیکا پڈوکون اور رنویر سنگھ کی محبت کی کہانی 2013 میں فلم ’گولیوں کی راس لیلا رام لیلا‘ کے سیٹ سے شروع ہوئی تھی۔ دونوں نے کئی سال تک ایک دوسرے کو ڈیٹ کرنے کے بعد 14 نومبر 2018 کو شادی کی۔
دیپیکا پڈوکون کے لیے ماں بننا زندگی کے اہم ترین مراحل میں شامل ہے۔ ایک انٹرویو میں انہوں نے زچگی کو اپنی زندگی کا اب تک کا سب سے اہم کردار قرار دیتے ہوئے کہا تھا کہ وہ ہمیشہ ماں بننا چاہتی تھیں اور اب وہ اپنا بہترین کردار ادا کر رہی ہیں۔
دوسری بیٹی کی آمد کے ساتھ ہی دیپیکا اور رنویر کی زندگی میں خوشیوں کا ایک اور باب شامل ہوگیا ہے۔
