وزیراعظم شہباز شریف نے دانش آئی ٹی پارک اسلام آباد کو عالمی معیار کا ٹیکنالوجی مرکز بنانے اور منصوبے کا تھرڈ پارٹی آڈٹ کرانے کی ہدایت کردی۔
وزیراعظم آفس کے میڈیا ونگ کے مطابق شہباز شریف کی زیر صدارت دانش آئی ٹی پارک اسلام آباد سے متعلق جائزہ اجلاس ہوا، جس میں آئی ٹی برآمدات بڑھانے اور شعبے میں سرمایہ کاری کے فروغ کے لیے جامع نظام کی تشکیل پر بریفنگ دی گئی۔
مزید پڑھیں:اسلام آباد لٹریچر فیسٹیول: پاکستان میں بچوں کو معیاری تعلیم میسر نہیں، جین میرٹ کا افتتاحی خطاب
وزیراعظم نے کہا کہ پاکستانی نوجوانوں کو انفارمیشن ٹیکنالوجی، مصنوعی ذہانت اور مالیاتی ٹیکنالوجی کے شعبوں میں جدید مہارتیں فراہم کرنے اور آئی ٹی کاروباری افراد کے لیے نئے مواقع پیدا کرنے کا سفر جاری رکھا جائے گا۔
انہوں نے ہدایت کی کہ دانش آئی ٹی پارک کو تعلیمی اداروں اور صنعت کے مؤثر اشتراک سے جدید آئی ٹی نظام کا مرکز بنایا جائے اور عالمی ٹیکنالوجی کمپنیوں کی شراکت داری سے یہاں آپریشنز شروع کیے جائیں۔
وزیراعظم شہباز شریف نے دانش آئی ٹی پارک اسلام آباد کو عالمی معیار کا ٹیکنالوجی مرکز بنانے اور منصوبے کا تھرڈ پارٹی آڈٹ کرانے کی ہدایت کردی۔
@AmirSaeedAbbasi @KulAalam @abduljabbarisb https://t.co/czL8q8Q58x— Media Talk (@mediatalk922) October 12, 2026
وزیراعظم نے وزارتِ انفارمیشن ٹیکنالوجی کو دانش آئی ٹی پارک منصوبے کا جامع جائزہ لینے اور کیس اسٹڈی تیار کرنے کی بھی ہدایت کی۔
اجلاس کو بتایا گیا کہ پاکستان سافٹ ویئر ایکسپورٹ بورڈ کے تحت 50 نجی عمارتوں کو سافٹ ویئر ٹیکنالوجی پارکس میں اپ گریڈ کیا جا چکا ہے، جبکہ ملک میں اسٹارٹ اپس کی معاونت کے لیے 8 انکیوبیشن سینٹرز قائم کیے گئے ہیں۔
مزید پڑھیں:نیشنل ٹیکنالوجی پارک کا نام ’دانش آئی ٹی پارک‘ رکھ دیا گیا، ملک بھر میں توسیع کا اعلان
بریفنگ میں بتایا گیا کہ آئی ٹی ماہرین کو سہولتیں فراہم کرنے کے لیے 105 مشترکہ کام کی جگہیں فعال ہیں۔ دانش آئی ٹی پارک اسلام آباد میں آپریشنز شروع کرنے کے لیے عالمی ٹیکنالوجی کمپنیوں سے رابطے بھی کیے جا رہے ہیں۔
اجلاس میں وفاقی وزرا مصدق مسعود ملک، احد خان چیمہ، عطا اللہ تارڑ، شزہ فاطمہ خواجہ، وزیر مملکت بلال اظہر کیانی اور اعلیٰ سرکاری حکام نے شرکت کی۔
