ایم کیو ایم پاکستان کے رہنما خالد مقبول صدیقی نے کہا ہے کہ دھرتی ماں صرف پاکستان ہے۔ ملک میں مزید صوبے بننے چاہییں۔ اگر کوئی اس کو غداری سے تعبیر کرتا ہے تو اس سے بڑا غدار کوئی اور نہیں۔
کراچی میں میڈیا سے گفتگو کرتے ہوئے انہوں نے کہا کہ اردو زبان نے تمام قومیتوں کو ملانے میں کردار ادا کیا۔ اردو زبان نہ ہوتی تو کسی کی کوئی شناخت نہ ہوتی۔
مزید پڑھیں
انہوں نے کہا کہ یہاں لوگ سندھو دیش کا خواب سجائے بیٹھے ہیں۔ ہم صوبوں کو صرف انتظامی یونٹ سمجھتے ہیں۔ اگر ہمیں اقتدار کا لالچ ہوتا تو کراچی کا میئر ہم بھی بنا سکتے تھے۔
خالد مقبول صدیقی کا کہنا تھا کہ ہم پاکستان کو اس راستے پر ڈالیں گے جس کے لیے یہ ملک بنایا گیا تھا۔
انہوں نے کہا کہ پیپلزپارٹی کا میئر عوام کا نمائندہ نہیں۔ ہمیں قائد اعظم کے پاکستان سے بھٹو کے پاکستان میں دھکیل دیا گیا۔ کراچی کا میئر بننے سے کوئی شہر کا مالک نہیں بن جاتا۔
واضح رہے کہ ایم کیو ایم ہمیشہ سے مزید صوبے بنانے کا مطالبہ کرتی آ رہی ہے مگر پیپلزپارٹی نے سندھ کی تقسیم کی ہمیشہ مخالفت کی ہے۔
ایم کیو ایم نے حالیہ بلدیاتی انتخابات میں حلقہ بندیوں کے معاملے پر احتجاجاً بائیکاٹ کیا۔ اس کے علاوہ مردم شماری پر بھی ان کو تحفظات ہیں۔
