آسٹریلیا کے سابق فاسٹ باؤلرگلین میک گراتھ نے رواں سال بھارت میں ہونے والے ون ڈے ورلڈ کپ میں پاکستان سمیت 4 موسٹ فیورٹ ٹیموں کے ناموں کا اعلان کر دیا ہے۔
اپنے ایک انٹرویو میں گلین میک گراتھ نے کہا کہ ورلڈکپ کے لیے ان کی پسندیدہ 4 بہترین ٹیموں میں پاکستان، انگلینڈ، آسٹریلیا اور میزبان بھارت شامل ہیں۔
انہوں نے کہا کہ رواں سال بھارت میں ہونے والے ون ڈے ورلڈ کپ کی 4 بہترین ٹیموں کو ٹاپ فور میں دیکھ رہا ہوں، میرے خیال میں آسٹریلیا بھی میگا ایونٹ جیتنے کی اہلیت رکھتا ہے۔ جب کہ میزبان بھارت کو ہوم کنڈیشنز اور اپنے تماشائیوں کا فائدہ حاصل ہوگا۔
گلین میک گراتھ کا کہنا ہے کہ پاکستان اور انگلینڈ نے حالیہ عرصے میں بہترین کرکٹ کھیلی ہے، دونوں ٹیموں کے پاس بہترین کھلاڑی ہیں۔ ورلڈکپ2023 کا آغاز 5 اکتوبر 2023 کو بھارت میں ہو رہا ہے۔
