ایشین ہاکی چیمپئنز ٹرافی میں پاکستان پہلے مرحلے کے آخری میچ میں میزبان بھارت کے ہاتھوں شکست کے بعد سیمی فائنل کی دوڑ سے باہر ہو گیا ہے۔ پاکستان پہلی مرتبہ ایشین ہاکی چیمپئنز ٹرافی میں سیمی فائنل کی دوڑ سے باہر ہوا ہے۔
بھارت کے شہر چنئی میں ہونے والے میچ میں بھارتی ہاکی ٹیم پورے میچ کے دوران چھائی رہی۔ 15 ویں منٹ میں بھارت کو پنالٹی کارنر ملا جس کو ہرمن پریت سنگھ نے گول میں تبدیل کر دیا۔
23 ویں منٹ میں ہرمن پریت نے دوسرا گول اسکور کرکے بھارت کو 0-2 کی برتری دلا دی۔ تیسرے کوارٹر میں جگراج سنگھ نے پنالٹی کارنر کو گول میں تبدیل کیا یوں 31 ویں منٹ میں کھیل کا اسکور بھارت کے حق میں 0-3 تھا۔
مزید پڑھیں
55 ویں منٹ میں آکاش دیپ سنگھ نے چوتھا گول اسکور کیا اور یوں 0-4 کی شکست کے ساتھ ساتھ پاکستان ایونٹ میں پہلی مرتبہ سیمی فائنل کی دوڑ سے باہر ہو گیا۔
پاکستان ٹیم کے 5 میچز میں 5 پوائنٹس رہے۔ جاپان اور جنوبی کوریا کے بھی 5، 5 پوائنٹس تھے مگر پاکستان منفی 5 کے گول فرق کی وجہ سے ٹاپ فور میں نہ آسکا۔
2023 میں ایشین چیمپئنز ٹرافی کا ساتواں ایڈیشن کھیلا جا رہا ہے، پاکستان نے ابتدائی 5 ایڈیشنز میں ہر بار فائنل کھیلا جبکہ 2021 میں اس نے سیمی فائنل کھیلا تھا۔ 2023 کی سیمی فائنل لائن اپ پاکستان کے بغیر رہے گی۔
