انسداد دہشتگردی عدالت نے الیکشن کمیشن کے باہر احتجاج کے کیس میں چیئرمین تحریک انصاف عمران خان کی درخواست ضمانت مسترد کر دی ۔
نمائندہ وی نیوز کے مطابق الیکشن کمیشن کے باہر احتجاج کرنے پر چیئرمین پی ٹی آئی عمران خان کے خلاف کیس کی انسداد دہشت گردی کی عدالت کے جج راجا جواد عباس حسن نے سماعت کی،عدالت نے عدم پیشی پر عمران خان کی درخواست ضمانت مسترد کر دی۔
کیس کی سماعت کے دوران عمران خان کے وکیل بابر اعوان عدالت میں پیش ہوئے جنہوں نے ایف آئی آر پڑھ کر سنا ئی اور کہا کہ ایڈیشنل سیشن جج نے عمران خان کو 27 فروری تک ۔عبوری ضمانت دے رکھی ہے، عدالت سے استدعا ہے کہ آپ بھی 27 فروری تک عبوری ضمانت میں توسیع دے دیں۔
بابر اعوان نے دلائل دیتے ہوئے کہا کہ عمران خان نے کوشش کی مگر سفر نہیں کر سکے، وہ نہ کبھی ملک اور نہ ہی عدالت سے بھاگے ہیں۔
بابر اعوان نے کہا کہ پوری کابینہ سوچ رہی ہے کہ عمران خان کو کیسے گرفتار کیا جائے؟ گرفتاری کے لیے یہ بھی سوچا جا رہا ہے کہ گرفتار کیسے کریں؟
بابر اعوان نے کہا کہ عدالت ضمانت کی درخواست یہ کہہ کر واپس کر دے کہ دہشت گردی کی دفعات نہیں بنتیں۔
جج راجا جواد عباس حسن نے کہا کہ اسلام آباد ہائی کورٹ کے ایک فیصلے نے ہمارے ہاتھ باندھے ہوئے ہیں، چالان جمع ہونے کے بعد ہم اس مرحلے پر پہنچیں گے، اگر بلٹ انجری پر ایک ملزم کو ریلیف دیا تو دیگر کو بھی دینا پڑے گا۔
عمران خان کے وکیل بابر اعوان نے کہا کہ عدالت ایک آخری موقع دے کر سمن جاری کر دے، میں 10 ہزار کا شیورٹی بانڈ جمع کرانے کو تیار ہوں، مجھے ضمانت کی درخواست واپس لینے کی ہدایات لینے دیں۔
انسدادِ دہشت گردی کی عدالت کے جج نے کہا کہ اگر آپ ضمانت کی درخواست واپس لینا چاہتے ہیں تو دروازہ کھلا ہے، اگر درخواست واپس نہ لی تو عدالت فیصلہ سنائے گی، اگر لاہور ہائی کورٹ سے حفاظتی ضمانت لے کر آئیں تو وہ دروازہ بھی کھلا ہے۔
انسدادِ دہشت گردی کی عدالت نے کیس کی سماعت میں آدھے گھنٹے کا وقفہ کر دیا، آدھے گھنٹے کے وقفے کے بعد عمران خان کے عدالت نہ پہنچنے پر انسداد دہشتگردی عدالت کے جج راجا جواد عباس حسن نے عمران خان کی درخواست ضمانت مسترد کر دی۔
اس سے قبل انسدادِ دہشت گردی کی عدالت نے عمران خان کو آج ڈیڑھ بجے پیش ہونے کا حکم دیا تھا۔
جج جواد عباس نے احکامات جاری کرتے ہوئے عمران خان کی استثنیٰ کی درخواست بھی خارج کر دی تھی۔
الیکشن کمیشن کے باہر احتجاج کے کیس میں عمران خان عبوری ضمانت پر ہیں۔
عدالت نے آج تک حاضری کے لیے عمران خان کو مہلت دے رکھی تھی۔
واضح رہے کہ بینکنگ کورٹ بھی عمران خان کو آج عدالتی وقت ختم ہونے سے پہلے پیش ہونے کا حکم دے چکی ہے۔
بینکنگ کورٹ نے ممنوعہ فنڈنگ کیس میں عمران خان کی حاضری سے استثنیٰ کی درخواست مسترد کرتے ہوئے ان کو آج ساڑھے 3 بجے تک پیش ہونے کی مہلت دے دی۔
