’عمران خان کو ملنے والے کھانے دیگر قیدیوں کو بھی ملنے چاہییں‘

استحکام پاکستان پارٹی (آئی پی پی) کی ترجمان ڈاکٹر فردوس عاشق اعوان نے کہا ہے کہ عمران خان توشہ خانہ کیس میں سزا کی معطلی سے صادق و امین نہیں بن گئے، ایک جماعت کئی روز پہلے یہ فیصلہ سنا چکی تھی۔

اسلام آباد میں پریس کانفرنس کرتے ہوئے فردوس عاشق اعوان نے کہاکہ عمران خان کو جیل میں جو کھانے مل رہے ہیں وہ اٹک جیل کے دیگر قیدیوں کو بھی ملنے چاہییں۔ قیدی نمبر 804 کے ساتھ چہیتوں جیسا سلوک کیا جا رہا ہے۔

فردوس عاشق اعوان نے کہاکہ ہم انصاف کے تقاضے پورے ہوتے دیکھنا چاہتے ہیں، قوم اس وقت مہنگائی سے مکمل نجات چاہتی ہے،

ترجمان استحکام پاکستان پارٹی نے کہاکہ ہماری جماعت ہر حال میں آئین کی بالادستی دیکھنا چاہتی ہے، عوام کی فلاح و بہبود ہماری اولین ترجیح ہے۔

فردوس عاشق اعوان کا کہنا تھا کہ سابق حکومت نے آئی ایم ایف سے گٹھ جوڑ کر کے ملک کو مہنگائی کی دلدل میں دھکیل دیا ہے۔ دکھوں کے شکار عوام کو ریلیف ملنا چاہیے۔