سپریم کورٹ میں ایک ماہ کے دوران 1579 زیر التوا مقدمات کے اضافے کے بعد عدالتِ عظمٰی میں مجموعی طور پر زیر التوا مقدمات کی تعداد 56 ہزار 544 ہوگئی ہے۔
سپریم کورٹ نے 31 اگست تک زیر التوا مقدمات کی رپورٹ جاری کر دی ہے، جس کے مطابق عدالت عظمی میں زیر التوا سول پیٹیشنز کی تعداد 30 ہزار 578 تک پہنچ گئی ہے۔
رپورٹ کے مطابق سپریم کورٹ میں ایک ماہ کے دوران 1579 زیر التوا مقدمات کا اضافہ ریکارڈ کیا گیا ہے، جس کے بعد زیر التوا مقدمات کی تعداد 54 ہزار 965 سے بڑھ کر 56 ہزار 544 ہوگئی ہے۔
رپورٹ کے مطابق زیر التوا سول اپیلوں کی تعداد 9 ہزار 875 ہوگئی ہے، عدالت عظمیٰ میں زیر التوا فوجداری درخواستوں کی تعداد 9 ہزار 384 ہے، اسی طرح زیر التوا نظرثانی درخواستوں کی تعداد ایک ہزار 653 ہے۔
سپریم کورٹ سے جاری کردہ رپورٹ کے مطابق سپریم کورٹ میں 25 از خود نوٹسز سمیت ایک ریفرنس بھی زیر التوا ہے۔
