حکومت کی طرف سے ڈالر کے اسمگلرز کے خلاف کریک ڈاؤن کے بعد امریکی کرنسی کی قدر میں روزانہ کی بنیاد پر کمی ہورہی ہے۔
کاروباری ہفتے کے چوتھے روز انٹربینک میں ڈالر 86 پیسے سستا ہو کر 297 روپے 96 پیسے کا ہو گیا ہے۔
اوپن مارکیٹ میں بھی ڈالر کی قدر میں کمی کا سلسلہ جاری ہے، جمعرات کو اوپن مارکیٹ میں ڈالر 3 روپے سستا ہو کر 298 روپے پر بند ہوا۔ گزشتہ روز انٹربینک میں کاروبار کے اختتام پر امریکی کرنسی کی قیمت 298 روپے 82 پیسے تھی۔
ڈالر کی قدر میں مسلسل کمی پر ماہرین معیشت کا خیال ہے کہ اسمگلرز کے خلاف کارروائیوں کی وجہ سے امریکی کرنسی کی قدر گر رہی ہے۔
پاکستان فاریکس ایکسچینج ایسوسی ایشن کے چیئرمین ملک بوستان کہتے ہیں کہ ڈالر کے اسمگلرز کے خلاف آپریشن جاری اور اسمگلنگ بدستور بند رہی تو ڈالر کی قدر 250 روپے تک آنے کی توقع ہے۔
ملک بوستان نے ڈالر بیچنے کے لیے آنے والوں کو تنگ نہ کرنے کا مطالبہ بھی کیا ہے تاکہ بلیک مارکیٹنگ رک سکے۔
