محکمہ انسداد دہشت گردی (سی ٹی ڈی) پشاور کے اسپیشل چھاپہ مارٹیم کی گوئے نزد فقیر آباد بابا زیات علاقہ تھانہ خزانہ میں اہم کارروائی کے دوران داعش تنظیم کےمنظم گروہ کی پولیس پارٹی پر فائرنگ کی گئی تاہم جوابی فائرنگ سے 3 دہشت گرد ہلاک ہوگئے۔
سی ٹی ڈی کے ترجمان کے مطابق جمعے کو ایک خفیہ ذریعے سے اطلاع تھی کہ کالعدم تنظیم داعش کا ایک منظم گروہ پشاور کے گردونواح میں ٹارگٹ کلنگ و دیگرتخریبی کارروائی کی غرض سے منصوبہ بندی کرنے میں مصروف ہیں۔
اطلا ع پر سی ٹی ڈی پشاور کی اسپیشل چھاپہ مارٹیم زیر قیادت ڈی ایس پی آپریشن سی ٹی ڈی نے بمقام گوئے نزد فقیر آباد بابا زیات علاقہ تھانہ خزانہ کےقریب کارروائی کی جس کے دوران وہاں پر پہلے سے موجود نامعلوم دہشت گردوں نے پولیس پارٹی پر فائرنگ شروع کی لہٰذا پولیس نے بھی جوابی فائرنگ کی۔
فائرنگ کا سلسلہ آدھے گھنٹے تک جاری رہا تاہم پولیس ٹیم محفوظ رہی۔ فائرنگ کے بعد جائے وقوعہ پر سرچ آپریشن کے دوران 3 نامعلوم دہشت گرد مختلف مقامات پر مردہ پائے گئے جن کے قبضے سے اسلحہ و گولہ بارود برآمد ہوئے۔
ہلاک شدہ دہشت گردوں کے دیگر 5 تا 6 ساتھی اراضیات و دریا کنارے کا فائدہ اُٹھاتے ہوئے فرار ہونے میں کامیاب ہوگئے۔ دہشت گردوں کی شناخت کے لیے کارروائی جاری ہے۔
