’ٹرمپ جونیئر‘ کے ہیک شدہ اکاؤنٹ سے والد کے انتقال کی خبر وائرل

 سماجی رابطے کی ویب سائٹ ’ایکس‘ پر سابق امریکی صدر ڈونلڈ ٹرمپ کی موت کی خبر زیر گردش ہے اور یہ خبر ان کے بیٹے ٹرمپ جونیئر نے اپنے اکاؤنٹ سے شیئر کی ہے۔

ٹرمپ جونیئر نے اپنی پوسٹ میں لکھا، ’میں نہایت افسوس سے یہ اطلاع دے رہا ہوں کہ میرے والد ڈونلڈ ٹرمپ انتقال کر گئے ہیں۔ 2024ء میں اب میں صدرارتی انتخابات لڑوں گا۔‘

ٹرمپ جونیئر کی یہ پوسٹ صبح 8 بجکر 25 منٹ پر شیئر کی گئی۔ اس کے بعد اس اکاؤنٹ سے عجیب و غریب پوسٹس کا سلسلہ شروع ہو گیا، جس سے کافی لوگوں کو اندازہ ہو گیا کہ ٹرمپ جونیئر کا اکاؤنٹ ہیک ہو گیا ہے اور جس نے یہ ہیک کیا ہے وہی عجیب و غریب پوسٹس شیئر کر رہا ہے۔

ایک پوسٹ میں لکھا گیا، ’شمالی کوریا پر حملہ ہونے والا ہے‘۔

ایک صارف کو جب اس بات کا اندازہ ہوا تو اس نے پوسٹ کے جواب میں لکھا، ’100 فیصد ہیکڈ‘۔ اس کے بعد ایکس پر ’ہیکڈ‘ پر ٹرینڈ کرنے لگا اور صارفین اس صورتحال پر اپنی اپنی آراء دینے لگے۔

 ڈونلڈ ٹرمپ کو جب اس صورتحال کا پتہ چلا تو انہوں نے اپنے ’ٹرتھ سوشل‘ اکاؤنٹ سے ایک غیر متعلقہ پیغام شیئر کیا جس کا مقصد یہ بتانا تھا کہ وہ ابھی زندہ ہیں۔ انہوں نے یہ پیغام صبح 8 بجکر 46 منٹ پر شیئر کیا، یعنی اپنی موت کے پیغام کے وائرل ہونے کے 21 منٹ بعد۔