امریکا میں مسلمانوں کو رمضان المبارک میں نماز جمعہ اور نماز مغرب کی اذان لاؤڈ اسپیکر پر دینے کے لیے حکومت سے اجازت لینے کی ضرورت نہیں ہو گی۔
نیویارک کے سٹی ہال میں مسلم رہنماؤں کے ہمراہ نیوز کانفرنس میں اپنے خیالات کا اظہار کرتے ہوئے میئر نیویارک ایرک ایڈمز نے کہا ہے کہ ’نئے قوانین کے تحت نیویارک میں مساجد کو رمضان کے مقدس مہینے میں جمعۃ المبارک اور غروب آفتاب کے وقت اذان لاؤڈ اسپیکر سے نشر کرنے کے لیے خصوصی اجازت نامے کی ضرورت نہیں ہوگی، جمعہ روایتی اسلامی مقدس دن ہے اور مسلمان رمضان کے دوران غروب آفتاب کے وقت اپنا روزہ افطار کرتے ہیں۔‘
We’re cutting red tape and saying clearly that mosques and houses of worship are free to amplify their call to prayer on Fridays and during Ramadan without a permit necessary.
Read more: https://t.co/lVRw5brgVU https://t.co/pdjMDdJe9p pic.twitter.com/wkblirAeY6
— Mayor Eric Adams (@NYCMayor) August 29, 2023
ایرک ایڈمز کا کہنا ہے کہ محکمہ پولیس کا کمیونٹی افیئرز بیورو مساجد کے ساتھ مل کر نئے رہنما خطوط پر بات چیت کرے گا اور اس بات کو یقینی بنائے گا کہ اذان کو نشر کرنے کے لیے استعمال ہونے والے آلات مناسب ڈیسیبل لیول پر سیٹ ہوں، مساجد اور دیگر عبادت گاہیں 10 ڈیسیبل تک کی آواز میں اذان دی جاسکتی ہیں۔
انہوں نے کہا، ہم واضح طور پر کہہ رہے ہیں کہ مساجد اور عبادت گاہیں بغیر کسی اجازت کے جمعہ اور رمضان کے دوران اذان دینے کے لیے آزاد ہیں۔
ایرک ایڈمز کے ہمراہ نیوز کانفرنس میں شریک مسلم رہنما (آئیڈیل اسلامک اسکول کی پرنسپل) صومیہ فیروزی نے کہا کہ نیویارک سٹی کے نئے قوانین ان کے طالب علموں کو ایک مثبت پیغام دیتے ہیں اور ہمارے بچوں کو اذان سن کر یاد آتا ہے کہ وہ کون ہیں۔
