سپریم کورٹ آف پاکستان نے محکمانہ انکوائری کے خلاف سکول ٹیچر کی درخواست مسترد کردی ہے۔ رحیم یار خان کے سکول ٹیچر کو خواتین کو ہراساں کرنے اور موبائل چھیننے کے الزامات پر ریٹائرڈ کیا گیا تھا۔
دوران سماعت چیف جسٹس قاضی فائز عیسیٰ نے استفسار کیا کہ انکوائری کے بعد آپ کو بحال کردیا گیا تھا تو آپ ملازمت پر کیوں نہیں گئے؟ سکول ٹیچر نے بتایا کہ ’میں گیا تھا لیکن ری جوائننگ نہیں کرائی گئی، کہا گیا کہ آپ کو پینشن مل رہی ہے اس لیے دوبارہ جوائننگ نہیں ہوسکتی۔
چیف جسٹس نے پوچھا کہ آپ کی عمر کیا ہے؟ آپ نے متعلقہ فورم پر درخواست کی پیروی کیوں نہیں کی؟ آپ چاہتے ہیں کہ آپ کی درخواست مسترد کردیں؟ ایسا تو نہیں کہ آپ متعلقہ فورم پر جانا ہی نہیں چاہتے؟
مزید پڑھیں
جسٹس اطہر من اللہ نے ریمارکس دیے کہ ’آپ پر تو انتہائی سنجیدہ نوعیت کے الزامات ہیں آپ کو بحال کیسے کیا گیا، شکر کریں کہ انکوائری کا فیصلہ آپ کے حق میں ہے۔
سکول ٹیچر نے عدالت سے استدعا کی کہ ’میری دوبارہ جوائننگ کے حوالے سے آرڈر فرما دیں، اور کوئی گزارش نہیں۔اس پرعدالت عظمیٰ نے محکمانہ انکوائری کے فیصلے کیخلاف درخواست مسترد کرتے ہوئے ضابطے کے تحت معاملہ نمٹانے کا حکم دے دیا۔
