لاہور: انتہائی کم لاگت سے تعمیر ’پلاسٹک روڈ‘ کا افتتاح

پنجاب کی تاریخ میں بننے والی پہلی پلاسٹک روڈ کا افتتاح کر دیا گیا ہے۔

وزیراعلیٰ پنجاب محسن نقوی نے جم خانہ مال روڈ سے جیل روڈ تک بننے والی ظفر علی پلاسٹک روڈ کا افتتاح کیا۔

محسن نقوی نے ظفر علی پلاسٹک روڈ کا معائنہ کیا اور معیار کاجائزہ لیا، اس موقع پر سیکریٹری تعمیرات ومواصلات اور یونیورسٹی آف انجینئرنگ اینڈ ٹیکنالوجی لاہور کے پروفیسرز نے پلاسٹک روڈ کی افادیت کے بارے میں بریفنگ دی۔

وزیراعلیٰ محسن نقوی نے پلاسٹک روڈ کی تعمیر میں تکنیکی معاونت پر یونیورسٹی آف انجینئرنگ اینڈ ٹیکنالوجی کے پروفیسرز کی خدمات کو سراہا۔

اس موقع پر محسن نقوی نے کہاکہ پلاسٹک روڈ کے کامیاب تجربے کے بعد اس کا دائرہ کار مزید بڑھایا جائے گا۔ ایک ماہ تک موجودہ پلاسٹک روڈ کا جائزہ لے کر مزید ایسی سڑکیں بنائیں گے۔

انہوں نے کہاکہ مال روڈ کو بھی پلاسٹک روڈ میں تبدیل کیا جائے گا، پلاسٹک روڈ کم از کم 10 سال تک چلتی ہے اور یہ بارش کے پانی سے جلد ٹوٹے گی نہیں۔

محسن نقوی نے کہاکہ پلاسٹک روڈ پر لاگت بہت کم آئی ہے، اس سڑک کی تعمیر پر 6 کروڑ کی جگہ 2 کروڑ لاگت آئی ہے۔ جو پلاسٹک ماحولیاتی آلودگی کا باعث بن رہا تھا اسے ادھر استعمال کیا گیا ہے۔

وزیراعلیٰ نے کہاکہ پلاسٹک روڈ کی دیکھ بھال کی بھی زیادہ ضرورت نہیں ہوتی۔

پلاسٹک روڈ کے افتتاح کے موقع پر صوبائی وزرا اظفر علی ناصر، عامر میر، سیکریٹری تعمیرات و مواصلات، سیکریٹری اطلاعات، یو ای ٹی لاہور کے پروفیسرز، ڈپٹی کمشنر، ڈی جی پی آر اور متعلقہ حکام بھی موجود تھے۔