دہشتگردوں نے ایک بار پھر بلوچستان کو لہو لہو کردیا۔ صوبے کے اہم ضلعے مستونگ میں جمعہ کی صبح 12 ربیع الاول کے جلوس کے قریب زور دار خودکش دھماکا ہوا جس کے نتیجے میں درجنوں افراد جاں بحق ہوگئے۔ آئی جی پولیس بلوچستان عبدالخالق شیخ کے مطابق دھماکے میں ڈی ایس پی محمد نواز گشکوری سمیت 3 پولیس اہلکار جانبحق ہوئے ہیں۔
محمد نواز گشکوری نے یکم جنوری 1966 میں بلوچستان کے علاقے سبی میں آنکھ کھولی۔ اپنی گریجوایشن مکمل کرنے کے بعد محمد نواز گشکوری نے 2 اپریل 1988 میں محکمہ پولیس میں بطور اے ایس آئی شمولیت اخیتار کی۔
مزید پڑھیں
پانچ سال بطور اے ایس آئی اپنی ذمہ داریاں سر انجام دینے کے بعد انہیں 27 نومبر 1993 کو سب انسپکٹر کے عہدے پر ترقی دی گئی۔ محمد نواز گشکوری 5 اگست 2006 میں انسپیکٹر جبکہ 9 جون 2015 کو ڈی ایس پی کے عہدے پر فائز ہوئے۔
اپنی سروس کے دوران انہوں نے جھل مگسی، ڈھاڈر، باگ، کوئٹہ، زیارت، نصیر آباد، ہرنائی اور کوہلو میں اپنے فرائض سر انجام دیے۔ جبکہ 26 مئی 2023 کو بطور ڈی ایس پی مستونگ تعیناتی حاصل کی۔
آئی جی پولیس بلوچستان عبدالخالق شیخ کے مطابق بہادر ڈی ایس پی نے خود کش بمبار کو جلوس میں جانے سے روکتے ہوئے جام شہادت نوش کیا۔
