نگراں وفاقی وزیر داخلہ سرفراز بگٹی نے کہا ہے کہ پاکستان سے دہشتگردی کا مکمل خاتمہ کیا جائے گا، دہشتگرد جہاں پل رہے ہیں وہاں جا کر نشانہ بنائیں گے۔ بلوچستان میں ہونے والے دہشت گردی کے واقعات میں بھارتی خفیہ ایجنسی ’را‘ ملوث ہے۔
کوئٹہ میں پریس کانفرنس کرتے ہوئے نگراں وزیر داخلہ نے کہاکہ مستونگ خود کش دھماکے میں شہید ہونے والوں کی تعداد 55 ہو گئی ہے، پہلی بار ایسا ہوا کہ میلادالنبیؐ کے جلوس کو نشانہ بنایا گیا۔
مزید پڑھیں
وزیر داخلہ نے کہاکہ زخمیوں کے علاج کا بیڑا پاک فوج نے اٹھایا ہوا ہے اور آرمی چیف جنرل عاصم منیر کی ہدایت پر زخمیوں کا بہتر علاج کیا جا رہا ہے۔
انہوں نے کہاکہ ہم پاکستانی بھائیوں کے مقدس خون کا ضرور حساب لیں گے اور پاک سرزمین سے دہشتگردوں کا خاتمہ کیا جائے گا۔
سرفراز بگٹی نے کہاکہ دہشتگروں کے خلاف مل کر لڑیں گے، ہمیں سب معلوم ہے کون کہاں سے یہ کرا رہا ہے، حکومت کی دہشتگروں کے خلاف زیرو ٹالرنس پالیسی ہے۔
وزیر داخلہ کا کہنا تھا کہ تحقیقات کر رہے ہیں کہ دہشتگروں کو یہاں کون سپانسر کر رہا ہے، نہتے شہریوں کو نشانہ بنانے والے مسلمان نہیں ہو سکتے۔
واضح رہے کہ گزشتہ روز مستونگ میں جشن عید میلادالنبیؐ کے جلوس پر خود کش دھماکا کیا گیا تھا جس کے نتیجے میں 55 افراد شہید ہوئے ہیں۔ اس کے علاوہ ہنگو کی مسجد میں ہونے والے خود کش دھماکے میں 5 افراد زندگی کی بازی ہار گئے تھے۔
