پاکستان قومی کرکٹ ٹیم کے اسٹار کرکٹر اور وکٹ کیپر محمد رضوان نے کہا ہے کہ ورلڈ کپ کے ایک میچ میں بھارت نے پاکستان کو شکست دی لیکن قومی ٹیم نے ہمت نہیں ہاری، آئندہ میچز میں جیت کی بھرپور کوشش کریں گے اور قوم کی توقعات پر پورا اتریں گے۔
سوشل میڈیا پر ایک ویڈیو بیان میں محمد رضوان کا کہنا تھا کہ پاکستان سے ہمیں پیغامات ملے ہیں کہ ایک میچ ہارنے سے کچھ نہیں ہوتا، انہوں نے پاکستان کرکٹ کے نغمے ’ہمیں تم سے پیار ہے‘ کا حوالہ دیتے ہوئے کہا کہ جیسے ہم ہاریں یا جیتے قوم کو ہم سے پیار ہے، اسی طرح ہمارے دلوں میں بھی قوم کی محبت ہے۔
محمد رضوان نے کہا کہ کھیل میں ہار جیت ہوتی رہتی ہے، پاکستان نے بھی بھارت کو ہرایا ہوا ہے، لیکن ہمیں معلوم ہے کہ جیسے پاکستانی قوم اپنی ٹیم کو دعائیں اور محبت دیتی ہے بالکل ویسے ہی قومی ٹیم میں شامل ہر کھلاڑی کے دل میں قوم کی محبت ہے اور وہ جانتے ہے کہ قوم ان سے کیا چاہتی ہے، ورلڈ کپ کے آئندہ میچز میں قوم کو اچھا رزلٹ دیں گے۔
مزید پڑھیں
محمد رضوان نے مزید کہا کہ ورلڈ کپ میں ہر ٹیم کچھ نہ کچھ کامیابی حاصل کر کے پہنچتی ہے، ورلڈ کپ کا ہر میچ اہم ہے مگر اچھی ٹیموں کے ساتھ مقابلے میں اسکلز اور گیم کا شعور ہونا اہم ہیں، ہماری اسکلز بہتر ہیں لیکن گیم سے متعلق مزید شعور پیدا کرنا ہوگا اور فیلڈنگ کے شعبہ کو بہتر بنانا ہوگا۔
انہوں نے کہا کہ پاکستان کو ابھی تک غیر متوقع ٹیم کہا جا رہا تھا جو کہ بالکل درست ہے کیونکہ پاکستان کے پاس دنیا کے ٹاپ بولرز ہیں، انہوں نے کہا کہ یہ بات بھی درست ہے کہ ورلڈ کپ میں اسپنرز آؤٹ نہیں کر پارہے، لیکن اس کے باوجود اسپنرز بولنگ اچھی کر رہے ہیں، پاکستان کے اسپنرز شاداب خان اور محمد نواز پر ہمیں اعتماد ہے کہ وہ کسی بھی وقت میچ کا پانسہ پلٹ سکتے ہیں۔
محمد رضوان نے کہا کہ پاکستانی فینز نے ہمیشہ قومی ٹیم کو سپورٹ کیا ہے، ہم نے جیسا بھی پرفارم کیا پاکستانی فینز نے ہمیں سپورٹ کیا ہے، ہم جب پاکستان میں کسی سپاہی، ڈاکٹر، تاجر یا کسی بھی عام آدمی سے ملتے ہیں تو ہمیں اس بات کا اندازہ ہوتا ہے کہ وہ ہم سے کیا توقعات رکھتے ہیں، اس ورلڈ کپ میں ہم بھی ان کی توقعات پر پورا اترنے کی بھرپور کوشش کریں گے۔
