فنانشل ایکشن ٹاسک فورس ( ایف اے ٹی ایف ) نے یوکرین پر حملے کی پاداش میں روس کی رکنیت معطل کر دی ہے۔
خبر ایجنسی اے ایف پی کے مطابق ایف اے ٹی ایف کی جانب سے کہا گیا ہے کہ روسی فیڈریشن کے اقدامات ناقابل قبول طور پر فیٹف کے بنیادی اصولوں کے خلاف ورزی ہیں جن کا مقصد سلامتی، تحفظ اور عالمی مالیاتی نظام کی سالمیت کو فروغ دینا ہے۔ روس اب بھی ایف اے ٹی ایف کے معیارات پر عمل درآمد کے لیے جوابدہ ہے۔
رپورٹ کے مطابق پیرس میں ہونے والے پانچ روزہ اجلاس کے بعد فیٹف نے نائجیریا اور جنوبی افریقہ کو ان ممالک کی فہرست میں شامل کیا جن کی نگرانی میں اضافہ کیا گیا، اور کمبوڈیا اور مراکش کو اس کیٹیگری سے نکال دیا۔
واضح رہے کہ یوکرین پر حملے کے بعد روس کو پہلے ہی یورپ کی کونسل سے نکال دیا گیا ہے اور اقوام متحدہ کی انسانی حقوق کونسل سے بھی معطل کر دیا گیا ہے تاہم وہ اب بھی کئی ایک بین الاقوامی تنظیموں کا رکن ہے۔
