صدر مملکت ڈاکٹر عارف علوی نے پاکستان تحریک انصاف کے بنیادی حقوق اور ہموار سیاسی میدان کے حوالے سے خدشات پر غور کرنے کے لیے نگراں وزیراعظم انوارالحق کاکڑ کو خط لکھ دیا ہے۔
پی ٹی آئی کے مرکزی سیکریٹری جنرل عمر ایوب کی جانب سے لکھا گیا خط بھی نگراں وزیراعظم کو ارسال کر دیا گیا ہے۔
صدر مملکت نے خط میں لکھا ہے کہ انتخابات میں تمام سیاسی جماعتوں کو ہموار میدان فراہم کرنا ناگزیرہے، تمام رجسٹرڈ سیاسی جماعتوں کو مساوی مواقع کے حوالے سے آپ کے بیانات اطمینان بخش ہیں اور یقین ہے کہ جمہوریت ہی ملک کے لیے آگے بڑھنے کا واحد راستہ ہے۔
مزید پڑھیں
صدر نے خط میں لکھا کہ تمام سیاسی جماعتوں اور رہنماؤں کو حق حاصل ہے کہ وہ انتخابات میں حصہ لیں جبکہ عوام کو منتخب کرنے کی آزادی حاصل ہے۔
عارف علوی نے لکھا کہ صدر مملکت کو ریاست کے سربراہ کی حیثیت سے جمہوریہ کے اتحاد کی علامت سمجھا جاتا ہے، آئین کے آرٹیکل 41 کے تحت صدر مملکت پابند ہیں کہ وہ وزیراعظم اور تمام اداروں سمیت شہریوں کے حقوق کا تحفظ کریں، اسی وجہ سے پی ٹی آئی کے الزامات پر مشتمل خط آپ کو ارسال کر رہا ہوں۔
عارف علوی نے لکھا کہ میڈیا پر سیاسی وابستگیاں رکھنے والے افراد کی جبری گمشدگیاں زیر بحث آئیں، ایسے واقعات ملک میں تشویش کا باعث بنتے ہیں۔ اس کے ساتھ ساتھ خواتین سیاسی کارکنوں کی طویل نظر بندی اور ضمانت کے بعد دوبارہ گرفتاریاں معاملات کو حساس بناتی ہیں۔
خط میں انوارالحق کاکڑ کو مخاطب کرتے ہوئے کہا گیا ہے کہ آئین کے تحت ہر شہری کا حق ہے کہ اس کے ساتھ قانون کے مطابق سلوک کیا جائے، اس کے علاوہ آرٹیکل 17 کہتا ہے کہ کوئی بھی شہری سیاسی جماعت کی رکنیت یا تنظیم سازی کر سکتا ہے جبکہ آرٹیکل 19 شہری کو آزاد پریس کا حق دیتا ہے۔
صدر نے نگراں وزیراعظم انوارالحق کاکڑ کو حکومت کے سربراہ ہونے کے ناطے معاملات پر غور کرنے کا کہا ہے۔
