جمعیت علما اسلام کے سربراہ مولانا فضل الرحمان نے کہا ہے کہ مسلمان ممالک فلسطین کے عوام کے شانہ بشانہ کھڑے ہو جائیں۔ او آئی سی کو پیغام ہے کہ کمزور موقف مت دکھائے۔
مری میں جلسہ سے خطاب کرتے ہوئے مولانا فضل الرحمان نے کہاکہ اسرائیل فلسطین میں تاریخ کے بدترین مظالم ڈھا رہا ہے، یہاں تک کے بچوں اور خواتین کو بھی قتل کیا جا رہا ہے جو جنگی قوانین کی خلاف ورزی ہے۔
انہوں نے کہاکہ جمعیت علما اسلام نظریاتی سیاست پر یقین رکھتی ہے، ملک دشمن قوتوں کے خلاف جدوجہد جاری رہے گی، ہمارے اکابرین کی تاریخ قربانیوں سے بھری پڑی ہے۔
مزید پڑھیں
’امن و امان اور مستحکم معیشت کسی بھی ریاست کے لیے ضروری ہے‘۔
انہوں نے کہاکہ امریکا کو ابھی کل افغانستان میں شکست ہوئی ہے، وہ اب بھی اگر خود کو سپر پاور سمجھتا ہے تو احمق ہے، اور اگر ہم اسے سپر پاور سمجھیں تو ہم بھی احمق ہیں۔
مولانا فضل الرحمان نے کہاکہ ہم تو اتنا سمجھتے ہیں کہ مسلمان مسلمان کا بھائی ہے، آج پوری امت مسلمہ پر فرض ہے کہ وہ اپنے فلسطینی بھائیوں کےساتھ کھڑی ہو جائے۔
سربراہ جے یو آئی نے کہاکہ اگر امریکا اور مغربی دنیا اپنے بحری بیڑے لا کر صہیونی قوتوں کی مدد کر رہے ہیں تو مسلمانوں کو کیوں سانپ سونگھ گیا ہے۔
انہوں نے کہاکہ افغانستان کے محاذ پر ہمارے بھائیوں پر مشکل وقت آیا تو ہم شانہ بشانہ کھڑے ہوئے۔ اب فلسطین کے مسلمانوں پر مشکل آئی ہے تو پوری دنیا کے مسلمانوں پر فرض ہے کہ ان کے ساتھ کھڑے ہو جائیں۔
مولانا فضل الرحمان نے کہاکہ حماس کی قیادت نے ملاقات کے دوران کہا کہ ہمیں سب سے زیادہ امیدیں پاکستان سے ہیں کیوں کہ پاکستان اسلامی دنیا کا واحد ایٹمی ملک ہے۔
سربراہ جے یو آئی نے کہاکہ ہم نے ملک کی نظریاتی سرحدوں کی حفاظت کے لیے ہمیشہ جدوجہد کی۔ فلسطینی بھائیوں کی ہر فورم پر حمایت جاری رکھی جائے گی۔
