پاکستان کی ٹیسٹ کرکٹ ٹیم کے نو تعینات کپتان شان مسعود نے کہا ہے کہ چیلنجز کے باوجود پاکستان کو ریڈ بال میں آگے لے کر جائیں گے۔
شان مسعود نے ذمہ داری ملنے کے بعد پاکستان کرکٹ بورڈ کی مینجمنٹ کمیٹی کے چیئرمین ذکا اشرف سے ملاقات کی ہے۔
شان مسعود نے کہاکہ پاکستان کو ریڈ بال کرکٹ میں آگے لے جانے کے لیے محنت کریں گے، اہم ذمہ داری دینے پر پی سی بی کا مشکور ہوں، یقیناً قومی ٹیم کی قیادت کرنا اعزاز کی بات ہے۔
View this post on Instagram
واضح رہے کہ قومی ٹیم کی ورلڈ کپ میں ناقص کارکردگی کے باعث کپتان بابراعظم نے ذمہ داری قبول کرتے ہوئے تینوں فارمیٹ سے استعفیٰ دے دیا جس کے بعد پی سی بی نے شان مسعود کو ٹیسٹ اور شاہین شاہ آفریدی کو ٹی ٹوئنٹی کا کپتان مقرر کیا ہے۔
سابق کپتان بابر اعظم نے پی سی بی کی مینجمنٹ کمیٹی کے چیئرمین ذکا اشرف سے ملاقات کی جس کے بعد انہوں نے اپنے استعفے کا اعلان سوشل میڈیا کے ذریعے کیا۔
انہوں نے کہا کہ ’آج میں کرکٹ کے تمام فارمیٹس کی کپتان کی حیثیت سے دستبردار ہو رہا ہوں۔ یہ ایک مشکل فیصلہ ہے لیکن میرے خیال میں اس فیصلے کے لیے یہ ایک موزوں وقت ہے‘۔
بابر اعظم نے اس عزم کا اظہار کیا کہ وہ کرکٹ کے تینوں فارمیٹس میں پاکستان کی نمائندگی جاری رکھیں گے اور اپنے تجربے اور لگن سے نئے کپتان اور ٹیم کی سپورٹ کرتے رہیں گے۔
سابق قومی کپتان نے کہا کہ ’کپتانی کی اہم ذمے داری کے لیے مجھ پر اعتماد کرنے پر میں پاکستان کرکٹ بورڈ کا شکرگزار ہوں‘۔
