بنگلہ دیش کی سیاست میں ایک اہم پیشرفت کے طور پر نیشنل سٹیزن پارٹی (این سی پی) کے سابق سینئر رہنما میر ارشد الحق نے باضابطہ طور پر بنگلہ دیش نیشنلسٹ پارٹی (بی این پی) میں شمولیت اختیار کر لی۔
یہ بھی پڑھیں:بنگلہ دیش: اسلامی جماعتوں کا انتخابی اتحاد سیٹ ایڈجسٹمنٹ کے بحران کا شکار
وی نیوز کے مطابق نیشنل سٹیزن پارٹی کی مرکزی کمیٹی کے سابق جوائنٹ ممبر سیکریٹری اور چٹاگانگ سٹی یونٹ کے چیف کوآرڈینیٹر میر ارشد الحق نے بی این پی میں شمولیت اختیار کر لی ہے۔
بدھ کی سہ پہر انہوں نے ڈھاکا کے علاقے گلشن میں واقع پارٹی چیئرپرسن کے دفتر میں بی این پی کے قائم مقام چیئرمین طارق رحمان سے ملاقات کی۔ بعد ازاں بی این پی کے سیکریٹری جنرل مرزا فخرالاسلام عالمگیر نے انہیں پارٹی میں خوش آمدید کہا اور بنیادی رکنیت فراہم کی۔
اس موقع پر بی این پی کے خزانچی رشید الزمان ملت، پارٹی کنٹینٹ کری ایٹر ڈاکٹر صائم پرویز اور میڈیا سیل کے رکن شیرالکبیر خان بھی موجود تھے۔
واضح رہے کہ میر ارشد الحق نے 25 دسمبر کو این سی پی سے استعفیٰ دے دیا تھا اور جماعت اسلامی اور این سی پی کے درمیان ممکنہ سیاسی مفاہمت سے متعلق جاری مشاورت کے تناظر میں طارق رحمان کی حمایت کا اعلان کیا تھا۔ وہ این سی پی کے مرکزی اور چٹاگانگ میٹروپولیٹن حلقوں میں ایک مقبول رہنما سمجھے جاتے تھے اور پارٹی کی جانب سے انہیں آئندہ پارلیمانی انتخابات میں چٹاگانگ-16 (بانس خالی) کے حلقے سے نامزد بھی کیا گیا تھا۔
