چیئرمین پاکستان پیپلزپارٹی بلاول بھٹو نے کہا ہے کہ میں کسی سیاسی جماعت کو اپنا مخالف نہیں سمجھتا، تبدیلی کے نام پر ملک پر مسلط ہونے والوں نے تباہی لائی جبکہ ووٹ کو عزت دو اور گڈ گورننس کا نعرہ لگانے والی جماعت ان میں سے ایک نعرے پر بھی عملدرآمد نہیں کر سکی اور بے نقاب ہو کر مہنگائی لیگ بن چکی ہے۔
پشاور میں پیپلزپارٹی کے ورکرز کنونشن سے خطاب کرتے ہوئے بلاول بھٹو نے کہاکہ ہمارا مقابلہ مہنگائی، غربت اور بیروزگاری سے ہے، اس وقت روٹی، کپڑا اور مکان کے نعرے کی پہلے سے بہت زیادہ ضرورت ہے۔
انہوں نے کہاکہ پیپلزپارٹی کو کبھی بھی لیول پلیئنگ فیلڈ نہیں ملی، لیکن اگر کسی کا خیال ہے کہ زبردستی کسی کو وزیراعظم بنا دیا جائے گا تو یہ اس کی بھول ہے، پیپلزپارٹی کے جیالے بھرپور مقابلہ کریں گے۔
مزید پڑھیں
چیئرمین پاکستان پیپلزپارٹی نے کہاکہ 1988 کے الیکشن میں آئی جے آئی کے نام سے سیاسی اتحاد بنایا گیا تھا مگر پھر بھی بینظیر بھٹو الیکشن جیت کر پہلی خاتون وزیراعظم بنیں۔
بلاول بھٹو نے کہاکہ ہم کسی آئی جے آئی کا حصہ نہیں بنیں گے بلکہ تیر کے نشان پر انتخابات میں حصہ لیں گے اور کامیابی بھی حاصل کریں گے۔
انہوں نے کہاکہ پاکستان کے عوام بوڑھے سیاستدانوں سے بیزار ہو چکے ہیں اور نوجوان وزیراعظم چاہتے ہیں، اس لیے 70 سال کے سیاستدان مسجد میں بیٹھ کر ملک کے لیے دعا کریں۔
بلاول بھٹو نے کہاکہ ہم نے عوامی رابطہ مہم شروع کر دی ہے، نوجوانوں کو سمجھانا ہے کہ بھٹو ازم کیا ہے، بھٹو ازم کا مطلب ہے کہ اشرافیہ کی نہیں بلکہ اس ملک کے مزدوروں اور کسانوں کی خدمت کی جائے۔
انہوں نے کہاکہ ہم اصولوں کی بنیاد پر سیاست کرتے ہیں، ذوالفقار علی بھٹو اور بینظیر بھٹو نے جان دیدی مگر اصول سے پیچھے نہیں ہٹے۔
روٹی کپڑا اور مکان کے نعرے پر آج عملدرآمد کی ضرورت ہے
بلاول بھٹو نے کہاکہ ایک شخص کو اس ملک پر مسلط کیا گیا تھا جس نے کہاکہ یوٹرن لینا لیڈر کی نشانی ہے، اب ہماری ذمہ داری ہے کہ لوگوں کو بتائیں یوٹرن لینا لیڈر کی نہیں بزدل کی نشانی ہے۔
چیئرمین پیپلزپارٹی نے کہاکہ روٹی، کپڑا اور مکان کے نعرے پر عملدرآمد کی آج سب سے زیادہ ضرورت ہے۔
انہوں نے کہاکہ مجھے اپنے 16 ماہ کی کارکردگی پر فخر ہے اور اس کی بنیاد پر الیکشن لڑنے کے لیے تیار ہوں، عوام اتحادی حکومت میں شامل دیگر لوگوں سے بھی پوچھیں کہ کیا وہ کارکردگی کی بنیاد پر الیکشن لڑنے کے لیے تیار ہیں۔
بلاول بھٹو نے کہاکہ ملکی مسائل کے حل کے لیے جیالا وزیراعظم ناگزیر ہے، ہم حکومت میں آ کر کسان کارڈ بھی لے کر آئیں گے، اس کے علاوہ محنت کشوں کے لیے مزدور کارڈ لایا جائے گا۔
چیئرمین پاکستان پیپلزپارٹی نے کہاکہ پیپلزپارٹی کی حکومت بننے کے بعد کچی آبادیوں کو ریگولرائز کرتے ہوئے وہاں کے مکینوں کو مالکانہ حقوق دیے جائیں گے۔
انہوں نے پاکستان پیپلزپارٹی کے جیالوں سے اپیل کرتے ہوئے کہاکہ انتخابات تک ذاتی اختلافات کو ختم کر دیں تاکہ ملک میں پیپلزپارٹی کی حکومت بن سکے۔
