سلامتی کونسل غزہ میں کشیدگی رکوانے کے لیے کردار ادا کرے، چین کا مطالبہ

چین نےغزہ کے بحران سے نمٹنے اور مسئلہ فلسطین کے حل کے بارے میں اپنا موقف واضح کرتے ہوئے کہا ہے کہ اس وقت اولین ترجیح اقوام متحدہ کی سلامتی کونسل اور اقوام متحدہ کی جنرل اسمبلی کی متعلقہ قراردادوں پر مکمل عمل درآمد کرنا اور فوری طور پر جنگ بندی کرنا ہے۔

چینی وزارت خارجہ کی ترجمان ماؤ نینگ نے پریس کانفرنس کے دوران کہا کہ ہمیں انسانی حقوق کے بین الاقوامی قانون کی سختی سے پاسداری اور فلسطینی شہریوں کی جبری نقل مکانی کی مخالفت کرنی چاہیے۔

ماؤ نینگ نے کہا کہ موجودہ صورتحال کے کسی بھی حل میں 2 ریاستی فارمولے کی خلاف ورزی نہیں کی جا سکتی۔ اقوام متحدہ کی سلامتی کونسل کو عرب اور اسلامی ممالک کی آواز سنتے ہوئے کشیدگی میں کمی لانے کے لیے ذمہ دارانہ اقدامات کرنے چاہییں۔۔

انہوں نے عرب اور اسلامی ممالک کے وزرائے خارجہ کے مشترکہ وفد کے دورہ چین کے حوالے سے بتایا کہ چین کے نائب صدر ہان زنگ اور سی پی سی کی مرکزی کمیٹی کے سیاسی بیورو کے رکن اور وزیر خارجہ وانگ ای نے وفد سے ملاقات کی۔

انہوں نے کہاکہ چین عرب اور اسلامی ممالک کے ساتھ رابطے کو مضبوط کرتا رہے گا اور سلامتی کونسل پر زور دے گا کہ وہ غزہ کی صورتحال پر مزید اقدامات کرے۔