نگراں وزیراعظم پاکستان انوارالحق کاکڑ متحدہ عرب امارات کے دورے کے بعد 28 اور 29 نومبر کو کویت کا دورہ کریں گے۔
ترجمان دفتر خارجہ کے مطابق وزیراعظم انوارالحق کاکڑ اپنے دورے کے دوران کویت کے ولی عہد شیخ مشعل الجابر الصباح اور ریاست کویت کے وزیراعظم شیخ احمد نواف الاحمد الصباح سے ملاقات کریں گے۔
وزیراعظم کے دورے کے موقع پر افرادی قوت، انفارمیشن ٹیکنالوجی، معدنیات کی تلاش، فوڈ سیکیورٹی، توانائی اور دفاع کے شعبوں میں تعاون کی یادداشتوں پر دستخط ہوں گے۔
ترجمان نے کہا کہ پاکستان اور کویت کے درمیان 6 دہائیوں پر محیط گہرے اور تاریخی تعلقات ہیں، سال 2023 کو دونوں ممالک کے سفارتی تعلقات کے قیام کی 60 ویں سالگرہ کے طور پر منایا جا رہا ہے۔
واضح رہے انوارالحق کاکڑ گزشتہ روز یو اے ای کے دورے پر روانہ ہوئے تھے جہاں آج اربوں ڈالر کے سمجھوتوں پر دستخط ہوئے ہیں۔
