بالی وڈ کے اسٹار اداکار سلمان خان نے کہا ہے کہ وہ اور ان کے ساتھی اداکار جنہوں نے 90کی دہائی میں بالی وڈ میں کام شروع کیا تھا، خوش قسمت ہیں کہ آج بھی بالی وڈ انڈسٹری میں ان کا بڑا نام ہے اور انہیں کام بھی ملتا ہے۔
اس میں کوئی شک نہیں کہ بالی وڈ میں نئے آنے والے اداکاروں نے بالی وڈ کا ماحول بدل دیا ہے، جس کی وجہ سے پرانے اداکاروں کو اب بالی وڈ میں اتنا کام نہیں ملتا، اس سے ہٹ کر بالی وڈ میں اب وہ بات نہیں رہی جو سلمان خان، عامر خان، یا شاہ رخ خان جیسے اداکاراؤں کی فلموں میں ہوتی تھی۔
ایک نیوز ایجنسی کو انٹرویو دیتے ہوئے سلمان خان نے اپنی فلم ’ٹائیگر 3‘ اور سنی دیول کی فلم ’غدار 2‘ کی کامیابی کو مدنظر رکھتے ہوئے کہا کہ ہم سب اداکارجو 90کی دہائی میں آئے تھے خوش قسمت ہیں کہ ہمیں آج بھی بالی وڈ میں کام مل رہا ہے۔
سلمان خان نے اپنے اور بالی وڈ کے باقی خانوں (عامر خان اور شاہ رخ خان) کے ساتھ ساتھ سنی دیول، اجے دیوگن اور اکشے کمار کا بھی نام لیا اور کہا کہ ان سب اداکاروں نے ایک ساتھ ہی کام شروع کیا تھا۔
سلمان خان کا کہنا ہے ’اس میں اس بات کا بہت بڑا ہاتھ ہے کہ آپ کس طرح کی فلموں میں کام کرتے ہیں۔ میں اپنے آپ کو بہت خوش قسمت سمجھتا ہوں کہ میں اتنے برسوں سے بالی وڈ میں کام کر رہا ہوں۔‘
سلمان خان نے اپنے مداحوں کی بھی تعریف کی ہے اور ان کا شکریہ ادا کرتے ہوئے کہا ہے کہ وہ جس دن بھی فلم ریلیز کریں، انہیں پتا ہوتا ہے کہ ان کے مداح ان کے ساتھ ہر لمحہ کھڑے ہیں۔
انہوں نے کہا کہ وہ سمجھتے ہیں، فلم صرف تب ہی کامیاب ہوسکتی ہے جب اس پر پوری محنت اور لگن سے کام کیا جائے، فلم ایسے بنائیں جسے لوگ بار بار دیکھنا چاہیں۔
